पुण्यानंतर मुंबईत खळबळ; CSMT, BMC वर संशयास्पद ड्रोन; नागरिक भयभीत

पुण्यातील हडपसरमध्ये सुपर स्पेशालिस्ट हॉस्पिटलच्या टॉयलेटमध्ये बॉम्बसदृश वस्तू आढळली. त्यानंतर बीडीएस पथकाची सात तासांची धावपळ उडाली. त्याचवेळी दुसरीकडे मुंबईच्या महानगरपालिका मुख्यालय, छत्रपती शिवाजी महाराज रेल्वे स्थानक परिसरात संशयास्पद ड्रोन सदृश्य उडवल्याची माहिती समोर आली आहे. पोलिसांची परवानगी न घेता ड्रोन उडवला गेल्याची माहिती मिळत आहे. मुंबई महानगरपालिका मुख्यालय आणि छत्रपती शिवाजी महाराज रेल्वे स्थानक या अतिसंवेदनशील परिसरात संशयास्पद ड्रोनसदृश्य वस्तू आढळल्याने एकच खळबळ उडाली. सुरक्षिततेच्या दृष्टीने हा परिसर 'नो फ्लाय झोन' घोषित करण्यात आला आहे. त्याच परिसरात ड्रोन दिसल्याने परिसरात भीतीचे वातावरण निर्माण झालंय. परवानगी न घेता ड्रोन उडवणाऱ्यांवर काय कारवाई केली जाते, हे पाहावे लागणार आहे. या ड्रोनविषयी प्रशासनाकडून अधिकृत माहिती समोर आलेली नाही.