एकनाथ शिंदेंचे नगरसेवक फुटणार? महापालिका निवडणूक निकालानंतर मुंबईत 'राजकीय हायअलर्ट'!

मुंबई महापालिका निवडणुकीचा निकाल लागताच राजकीय डावपेच सुरू झाले आहेत. राज्याचे उपमुख्यमंत्री आणि शिंदेसेनेचे प्रमुख एकनाथ शिंदे यांनी निकालानंतर पक्षाच्या नवनिर्वाचित नगरसेवकांना हॉटेलमध्ये शिफ्ट केलं आहे. नगरसेवक फुटण्याच्या भीतीने ही खबरदारी घेतल्याचे सांगितले जात आहे.

आकड्यांचा खेळ हा नगरसेवक फुटीच्या भीतीमागचं कारण आहे. २२७ सदस्यांच्या मुंबई महापालिकेत मॅजिक फिगर ११४ आहे. भाजपने ८९ जागा जिंकल्या आहेत. तर एकनाथ शिंदेंच्या शिवसेनेला २९ जागांवर विजय मिळाला आहे. या युतीचा आकडा ११८ पर्यंत पोहोचला असून, बहुमतापेक्षा चार जागा अधिक आहेत. मात्र, नगरसेवक फुटण्याची भीती शिंदेंना सतावत असल्याचे बोलले जाते. खबरदारी म्हणून शिंदेंनी आपल्या २९ नगरसेवकांना वांद्र्यातील 'ताज लँड्स एंड' हॉटेलमध्ये ठेवलं आहे. नगरसेवक फुटू नयेत किंवा घोडेबाजार होऊ नये यासाठी ही खबरदारी घेतली जात आहे. पुढील तीन दिवस हे सर्व नगरसेवक याच हॉटेलमध्ये मुक्कामाला असतील. उपमुख्यमंत्री एकनाथ शिंदे स्वतः या नगरसेवकांशी संवाद साधून पुढील रणनीती ठरवणार आहेत.