Mumbai Local Train : मराठी बोला तुम्ही मराठी बोला, मुंबई लोकल ट्रेनमधलं गाणं व्हायरल | VIDEO

मुंबई लोकलमधील एक गाणं समोर आलं आहे. मराठी बोला तुम्ही मराठी बोला, असे शब्द असलेलं हे गाणं आलं असून, सध्या सोशल मीडियावर याची जोरदार चर्चा रंगली आहे. महाराष्ट्र सरकारने प्राथमिक शिक्षणात हिंदी सक्ती करण्याचा निर्णय घेतल्यानंतर राज्यभर तीव्र विरोध झाला होता. अनेक मराठीप्रेमी संघटना आणि नागरिकांनी या निर्णयाविरोधात संताप व्यक्त केला होता. वाढत्या विरोधाच्या पार्श्वभूमीवर अखेर महायुती सरकारला आपला निर्णय मागे घ्यावा लागला आणि संबंधित जीआर रद्द करण्यात आला. या संपूर्ण घडामोडींनंतर मुंबई लोकलमध्ये वाजवले जाणारे हे मराठी अस्मितेला साद घालणारे गाणं समोर आलं आहे. "मराठी बोला" या गाण्याच्या माध्यमातून मराठी भाषेच्या संवर्धनाचा आणि अभिमानाचा संदेश दिला जात असून, यामध्ये भाषिक अस्मिता जागवण्याचा प्रयत्न असल्याचं दिसत आहे.