५० प्रवाशांना घेऊन निघालेल्या एसटी बसचे चाक निखळले; अर्धा किमी पुढे गेल्यानंतर दुसरा टायरही फुटला, VIDEO

फय्याज शेख | साम टीव्ही

महाराष्ट्र राज्य परिवहन महामंडळाच्या जव्हार आगाराच्या बसचे चाक अचानक निखळले. ही बस ठाण्याहून जव्हारकडे जात होती. चाक निखळल्यानंतर बस तब्बल अर्धा किलोमीटर मागील चाकावर धावत राहिली. पुढे दुसरे चाकही फुटले. बसचालकाने प्रसंगावधान राखून बस सुरक्षितरित्या थांबवली. त्यामुळे मोठा अनर्थ टळला. या बसमध्ये ५० प्रवासी होते.

ठाण्याहून जव्हारकडे निघालेली जव्हार आगाराची एसटी बस वाडा-भिवंडी महामार्गावरील नेहरोली परिसरात पोहोचली. अचानक बसचे मागील एक चाक निखळले. चालक आणि वाहकाच्या ही बाब लगेच लक्षात आली नाही. बस अंदाजे अर्धा किलोमीटरपर्यंत धावत होती. मागच्या एका चाकावरच बस धावली, असे प्रवाशांनी सांगितले.

पुढे गेल्यानंतर बसचे दुसरे चाक देखील फुटले. त्यामुळे बस अनियंत्रित होण्याच्या स्थितीत होती. चालकाने प्रसंगावधान राखून बस सुरक्षितपणे थांबवल्याने मोठा अपघात टळला. बसमध्ये महिला, ज्येष्ठ नागरिक असे ५० प्रवासी होते.