Maharashtra Politics : वरळी विधानसभेत यंदा तिहेरी लढत होणार? आदित्य ठाकरेंविरोधात महायुतीचा उमेदवार कोण, पाहा VIDEO

मुंबई : यंदाच्या विधानसभा निवडणुकीमध्ये महाविकास आघाडी आणि महायुतीमध्ये जोरदार संघर्ष पाहायला मिळतोय. आता आदित्य ठाकरेंविरोधात महायुतीचा उमेदवार कोण असणार? हा प्रश्न सर्वांना होता. यावर आता आदित्य ठाकरेंविरोधात महायुतीकडून अजित पवार यांच्या राष्ट्रवादीचा उमेदवार ठरला आहे, अशी जोरदार चर्चा सध्या राजकीय वर्तुळात सुरू आहे. त्यामुळे महायुतीचा उमेदवार कोण आहे, याकडे संपूर्ण राज्याचं लक्ष लागलेलं आहे.

आदित्य ठाकरे यांच्या वरळी विधानसभा मतदारसंघामध्ये अमोल मिटकरी हे संभाव्य उमेदवार, अशा आशयाचे बॅनर लागलेले आहेत. तर मनसेकडून संदीप देशपांडे रिंगणात उतरणार असल्याच्या देखील चर्चा आहेत. त्यामुळे आगामी विधानसभा निवडणुकीत आता तिहेरी लढत पाहायला मिळणार का? अशी जोरदार सध्या चर्चा सुरू आहे. एकीकडे महाविकास आघाडीमध्ये जागावाटपाची चर्चा सुरू आहे, तर दुसरीकडे महायुतीच्या उमेदवारांचे बॅनर लागत असल्याचं पाहायला मिळत आहे. वरळीत यंदा विधानसभा निवडणुकीत मोठी चुरस पाहायला मिळणार, हे मात्र नक्की आहे.