'....यासारखा दुसरा विनोद नाही', कोकाटेंना क्रिडा खाते देताच, बड्या खासदाराकडून सत्ताधाऱ्यांवर सडकून प्रहार

सभागृहात मंत्री माणिकराव कोकाटेंचा रमी खेळत असतानाचा व्हिडिओ व्हायरल झाला होता. यानंतर विरोधकांनी त्यांच्या कृषीमंत्रिपदाचा राजीनामा मागितला होता. दरम्यान, आता माणिकराव कोकाटे यांची कृषिमंत्रिपदावरून उचलबांगडी करण्यात आली आहे. त्यांच्याकडे क्रीडा आणि युवक कल्याण विभागाची जबाबदारी सोपवण्यात आली आहे. तर, दत्तात्रय भरणे यांची राज्याचे नवे कृषिमंत्री म्हणून नियुक्ती करण्यात आली आहे.

यावरून राष्ट्रवादी शरद पवार गटाच्या खासदार सुप्रिया सुळे यांनी राज्य सरकारवर जोरदार प्रहार केला आहे. 'एकीकडे तरूण पिढी ऑनलाईन रमीच्या मागे लागून बरबाद होत आहे. रमीवर बंदी घालण्याची मागणी होत असतानाच, कोकाटेंना विधिमंडळात रमी खेळल्याचे बक्षीस म्हणून क्रिडा आणि युवक कल्याणसारखे महत्वाचे खाते देण्यात आले आहे. यासारखा दुसरा विनोद नाही', असं सुप्रिया सुळे म्हणाल्या.