Maharashtra Politics: महाविकास आघाडी फुटली; संजय राऊतांच्या भूमिकेवर काँग्रेसची नाराजी

भरत मोहळकर, साम प्रतिनिधी

आगामी स्थानिक स्वराज्य संस्थांच्या निवडणुकीपूर्वी महाविकास आघाडीतील धुसफूस टोकाला गेलीय. तर ठाकरे गटाने स्वबळाचा नारा दिल्याने महाविकास आघाडीतील फूट स्पष्ट झालीय... याच महाविकास आघाडीच्या फुटीवरचा हा स्पेशल रिपोर्ट. विधानसभेच्या निकालानंतर महाविकास आघाडीत कुरघोडीचं राजकारण रंगलंय.

त्यातच येऊ घातलेल्या स्थानिक स्वराज्य संस्थांच्या निवडणुकांपूर्वी ठाकरे गटाने थेट स्वबळाचा नारा दिलाय. त्यामुळे महाविकास आघाडीत फूट पडल्याचं स्पष्ट झालंय. राऊतांचा दावा काँग्रेसच्या चांगलाच जिव्हारी लागलाय.. राऊतांनी माध्यमांसमोर बोलण्यापेक्षा महाविकास आघाडीच्या नेत्यांशी बोलावं, असं म्हणत वर्षा गायकवाड यांनी राऊतांना कानपिचक्या दिल्यात.

दुसरीकडे सुप्रिया सुळेंनी राऊतांच्या भूमिकेला दुजोरा देत कार्यकर्त्यांसाठी स्वबळाचा नारा दिलाय. इंडिया आघाडी ही फक्त लोकसभा निवडणूकीसाठी होती, असं वक्तव्य दिल्लीत काँग्रेस नेत्याने केल्यानंतर त्याचे पडसाद देशभर उमटले..त्यानंतर ठाकरे गटाने इंडिया आघाडी वाचवण्यासाठी काँग्रेसला निर्वाणीचा इशाराही दिला होता.

आता राज्यात ठाकरे गट आणि त्यापाठोपाठ शरद पवारांच्या राष्ट्रवादीनेही स्थानिक स्वराज्य संस्थांच्या निवडणूका स्वबळावर लढण्याचं स्पष्ट केलंय.. त्यामुळे महाविकास आघाडीत फूट पडल्याचं दिसत असलं तरी तिन्ही पक्षाचे नेते एकत्र बसून पुन्हा एकतेची वज्रमूठ आवळणार की स्वतंत्रपणे खिंड लढवणार? याकडे लक्ष लागलंय.