झिशान सिद्दीकींची आमदारकी अडचणीत? काय आहे संपूर्ण प्रकरण?

सुनेत्रा पवारांच्या राष्ट्रवादी काँग्रेसची विधान परिषदेसाठी झिशान सिद्दीकी यांच्या नावाची घोषणा करण्यात आली. झिशान यांच्या नावावर पक्षाच्या कोअर कमिटी आणि मुख्यमंत्री फडणवीसांसोबत प्रदीर्घ चर्चा झाली. त्यानंतर त्यांच्या नावावर शिक्कामोर्तब करण्यात आलं. परंतु आता झिशान सिद्दीकी यांच्या आमदारकीवर टांगती तलवार निर्माण झाल्याची खळबळजनक माहिती सूत्रांनी दिली आहे. राष्ट्रवादीचे प्रदेशाध्यक्ष सुनील तटकरे यांच्या एबी फॉर्मवरील सहीमुळे कायदेशीर वाद निर्माण झालाय.

सूत्रांनी दिलेल्या माहितीनुसार, निवडणूक आयोगाला पाठवण्यात आलेले पत्र आणि एबी फॉर्मवरील माहिती जुळत नसल्याचे सांगण्यात येत आहे. त्यामुळे वाद निर्माण झालाय. सुनेत्रा पवार यांच्या स्वाक्षरीने आयोगाला एक पत्र पाठवण्यात आलंय. त्यात तटकरेंच्या नावासमोर प्रदेशाध्यक्ष असा उल्लेख करण्यात आलेला नाही. त्यात सुनेत्रा पवारांच्या स्वाक्षरीने पत्रात पक्षाकडून करण्यात आलेला पत्रव्यवहार अंतिम सजण्यात यावे, असं नमूद करण्यात आलाय. तर दुसरीकडे झिशान सिद्दीकी यांनी ३० एप्रिल रोजी एबी फॉर्म जोडला. त्यात तटकरे यांची प्रदेशाध्यक्ष म्हणून स्वाक्षरी आहे. त्यामुळे झिशान सिद्दीकींची आमदारकी अडचणीत आल्याची चर्चा राजकीय वर्तुळात सुरू आहे.