Hingoli News : दारुड्या गुरुजींचा शाळेत राडा, व्हिडिओ झाला व्हायरल

हिंगोलीच्या मारसेलू गावात चक्क जिल्हापरिषद शाळेतील शिक्षकाने दारू पिऊन शाळेत गोंधळ घातला आहे. गजानन वळकुते असं या मद्यपी शिक्षकाचं नाव आहे.

आपल्याला विद्या देणारे शिक्षक हे देवासमान समजण्याची शिकवण आपल्याला दिली जाते. ज्या शाळेच्या पवित्र जागी मुलांचे भविष्य घडणार असते तिथेच स्वत: शिक्षकाने मद्य पिऊन गोंधळ घालणे ही लाजिरवाणी गोष्ट आहे. व्यसनांपासून दूर राहावे अशी शिकवण देणारे गुरुजीच दारू पिऊन तर्राट असलेले बघायला मिळाले आहे. हिंगोलीच्या मारसेलू येथील जिल्हापरिषद शाळा सुरू असतानाच हा शिक्षक दारूच्या नशेत झिंगत शाळेत दाखल झाला. याचा व्हिडिओ सोशल मिडियावर व्हायरल झाला आहे. दरम्यान, ही घटना समजताच ग्रामस्थांनी शिक्षणाधिकाऱ्यांना फोन करून या प्रकारची माहिती दिली. तसेच या शिक्षकावर कारवाई करण्याची मागणी केली आहे. स्वत: शिक्षकच असे वागत असतील तर विद्यार्थ्यांचे भवितव्य काय असा सवाल यावेळी पालकांनी उपस्थित केला आहे.