Buldhana Breaking : बुलढाण्यात मस्साजोगची पुनरावृत्ती? अवैध धंदे बंद केले म्हणून सरपंच पतीवर हल्ला

बुलढाणा जिल्ह्यातील मेहकर तालुक्यातील कळंबेश्वर या गावात अवैध धंदे बंद केल्याने चवताळलेल्या गावगुंडांनी सरपंच पतीवर प्राण घातक हल्ला केल्याची धक्कादायक घटना घडली आहे. विशेष म्हणजे हा हल्ला एका अंत्यसंस्काराच्या ठिकाणी करण्यात आला.

कळंबेश्वर येथील सुभाष खुरद यांच्या पत्नी डिसेंबर 2023 पासून ग्रामपंचायत सरपंच आहेत आणि त्या सरपंच पदावर आल्यापासून त्यांनी गावात विविध विकास कामे सुरू केलीत. कामे सुरू करत असताना त्यांनी गावातील अवैध धंदेही बंद केले. त्यामुळे गावातीलच अवैध धंदे असलेल्या गुंडांनी त्यांच्या पतीला म्हणजेच सुभाष खुरद यांना अनेकदा धमक्याही दिल्या. काल गावातील एका वृद्ध महिलेच्या अंतिम संस्काराच्या आटोपून घरी परत जात असताना गावातील पाच गुंडांनी सुभाष खुरद यांच्यावर प्राण घातक हल्ला चढवत..." आमचे अवैध धंदे पुन्हा सुरू न करू दिल्यास आम्ही तुझा मस्साजोगचा सरपंच करू...!" अशी धमकी देऊन निघून गेले. या हल्ल्यात सुभाष खुरद हे जखमी झाले असून त्यांच्या जवळील काही दागिने हल्लेखोरांनी लंपास केले. याप्रकरणी जानेफळ पोलिसांनी पाच आरोपींवर गुन्हा दाखल केला आहे. मात्र अद्यापही आरोपींना अटक झालेली नाही.