मुंबई, ठाणे, कोकण आणि पुण्यासह राज्यातील काही जिल्ह्यांसाठी अत्यंत महत्वाची बातमी आहे. हवामान विभागानं या भागांना सतर्कतेचा इशारा दिला आहे. पुढील २४ तासांत मुंबई, ठाणे जिल्ह्यांत मुसळधार पावसाचा इशारा देण्यात आला आहे. रत्नागिरी आणि सिंधुदुर्ग या जिल्ह्यांसाठी रेड अलर्ट देण्यात आला आहे. या जिल्ह्यांतील काही भागांत अतिमुसळधार पाऊस पडण्याचा अंदाज वर्तवण्यात आला आहे.
रायगड आणि ठाणे या दोन जिल्ह्यांना ऑरेंज अलर्ट देण्यात आला आहे. मुसळधार ते अतिमुसळधार पाऊस कोसळण्याची शक्यता व्यक्त केली आहे. तसेच विजांचा कडकडाट आणि ५० ते ६० किलोमीटर प्रतितास वेगाने वारे वाहण्याची शक्यता आहे. मुंबईसाठी येलो अलर्ट देण्यात आला आहे. पुढील २४ तासांत मुसळधार पाऊस कोसळेल. विजांचा कडकडाटासह ६० किलोमीटर प्रतितास वेगाने वारे वाहण्याची शक्यता व्यक्त करण्यात आली आहे.
या काळात हवामान विभागाकडून नागरिकांसाठी महत्वाच्या सूचना देण्यात आल्या आहेत. मुसळधार पाऊस कोसळत असताना, घाटात आणि किनारी भागांत प्रवास करणे टाळावे, वादळ आणि वीज चमकत असताना घरातच थांबावे. झाडांखाली आसरा घेणे टाळावे, तसेच अधिकाऱ्यांकडून मिळालेल्या सूचनांचे पालन करावे, असंही हवामान विभागाकडून सांगण्यात आले आहे.
पुण्यात कालपासूनच मुसळधार पावसाने धुमाकूळ घातला आहे. आज, शनिवारी सकाळी थोडी उसंत घेतल्यानंतर पुन्हा पुण्यातील अनेक भागांत मुसळधार पावसाला सुरुवात झाली. पावसामुळं सखल भागांत पाणी साचलं आहे. यातून मार्गक्रमण करताना मोठ्या त्रासाला सामोरे जावे लागत आहे. चांदणी चौकात जोरदार पाऊस पडला.
छत्रपती संभाजीनगरात सिल्लोडमध्ये वीज कोसळून चौघांचा मृत्यू झाल्याची दुर्दैवी घटना घडली. यात एक महिला आणि इतर तिघांचा समावेश आहे. हे सर्व जण शेतात पेरणीसाठी जात होते. त्यावेळी मुसळधार पाऊस कोसळत होता. ते चौघेही आडोशासाठी एका झाडाखाली थांबले होते. त्याचवेळी वीज कोसळली. यात त्यांचा मृत्यू झाला. चार जनावरंही ठार झाल्याचे वृत्त आहे.
कल्याण, डोंबिवली आणि बदलापूर परिसरातही पावसानं हजेरी लावली. विजांच्या कडकडाटासह पाऊस मुसळधार बरसतोय. कल्याणजवळील मलंग रोड पाण्याखाली गेल्याची माहिती आहे. डोंबिवलीतील एच प्रभाग कार्यालयाजवळील रस्त्यावर गुडघाभर पाणी साचले होते.
बुलढाणा जिल्ह्यातील मेहेकर, लोणार तालुक्यात पावसाची तुफान बॅटिंग सुरू आहे. जोरदार पावसाने शेतीला तलावाचं स्वरूप आलं आहे. वादळी वाऱ्यासह पावसानं हजेरी लावल्यानं सर्वांचीच तारांबळ उडाली.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.