Harshvardhan Patil News : शरद पवारांनी डाव टाकलाच! हर्षवर्धन पाटील 'तुतारी' हाती घेणार?

Harshvardhan Patil-Sharad Pawar Meeting : महाराष्ट्र विधानसभा निवडणूक होऊ घातली आहे. त्यामुळं आता पक्षप्रवेशांची चर्चा होणारच. गेल्या काही दिवसांपासून भाजप नेते हर्षवर्धन पाटील यांच्याही राष्ट्रवादी काँग्रेस शरदचंद्र पवार पक्षात प्रवेशाची जोरदार चर्चा सुरू आहे. पण आता या चर्चेला अधिक बळ मिळालंय. हर्षवर्धन पाटील यांनी मुंबईत सिल्व्हर ओकवर शरद पवार यांची भेट घेतली आहे. त्यामुळं पाटील हे तुतारी हाती घेणार हे जवळपास फिक्स झालं आहे. आता फक्त अधिकृत घोषणा व्हायची आहे, असंच चित्र आता तरी दिसतंय. इंदापूरमध्ये हर्षवर्धन पाटील यांची उद्या पत्रकार परिषद होणार आहे. पुढील चार दिवसांत पक्षप्रवेश होण्याची शक्यता आहे. हर्षवर्धन पाटील यांची मुलगी अंकिता पाटील आणि मुलगा राजवर्धन पाटील यांनी सोशल मीडियावर स्टेट्सवर तुतारी चिन्ह ठेवलंय. त्यामुळं प्रवेश तर होणार हे जवळपास निश्चित झालं आहे. तसंच इंदापूरच्या उमेदवारीवरून पाटील आणि पवारांमध्ये चर्चा झाल्याची माहिती सूत्रांनी दिली आहे.