Gokul Milk : ग्राहकांसाठी मोठी बातमी! अमूल आणि मदर डेअरीनंतर आता गोकुळ दूधही महागणार?

राज्यातील दूध ग्राहकांसाठी एक महत्त्वाची बातमी समोर येत आहे. अमूल आणि मदर डेअरीनंतर आता गोकुळ दूधही महाग होण्याची शक्यता निर्माण झाली आहे. त्यामुळे रोज दूध खरेदी करणाऱ्या ग्राहकांना लवकरच अधिक पैसे मोजावे लागू शकतात.

गोकुळ दूध संघाकडून विक्री दरात वाढ करण्याबाबत विचार सुरू असल्याची माहिती समोर येत आहे. विशेष म्हणजे, उद्या होणाऱ्या नव्या कार्यकारिणीच्या पहिल्याच बैठकीत या विषयावर चर्चा होण्याची शक्यता आहे. या बैठकीत दूध दरवाढीबाबत अंतिम निर्णय घेतला जाण्याची शक्यता वर्तवली जात आहे. गोकुळच्या दूध विक्री दरात वाढ करण्याचा निर्णय झाल्यास त्याचा परिणाम दूध उत्पादक शेतकऱ्यांवरही होणार आहे. कारण ग्राहकांकडून दूध विक्रीतून मिळणाऱ्या उत्पन्नाचा विचार करून दूध उत्पादकांना दिल्या जाणाऱ्या दरातही वाढ करावी लागणार आहे.

याआधी अमूल आणि मदर डेअरीने दूध दरात वाढ केल्याने ग्राहकांना महागाईचा सामना करावा लागत आहे. आता गोकुळनेही दरवाढ केली, तर ग्राहकांच्या मासिक खर्चात आणखी भर पडू शकते. मात्र, गोकुळच्या दूध दरात नेमकी किती वाढ होणार आणि ही वाढ कधीपासून लागू होणार, याबाबत अद्याप अधिकृत घोषणा झालेली नाही. त्यामुळे उद्याच्या बैठकीकडे दूध उत्पादकांसह ग्राहकांचेही लक्ष लागले आहे.