Lalbaugcha Raja : राजाच्या शेवटच्या दर्शनासाठी उसळला लाखोंचा भक्तीसागर

दहा दिवस लाडक्या गणरायाची मनोभावे पूजा केल्यानंतर घरगुती गणपतींसह सार्वजनिक मंडळांच्या गणपतींना आज, मंगळवारी भावपूर्ण निरोप देण्यात येणार आहे. मुंबईच्या गिरगाव चौपाटीवर मोठे गणपतींचे आगमन होण्यास सुरुवात झाली आहे. घरगुती गणपतींसमवेत इथं सार्वजनिक गणेशमूर्ती पण विसर्जनासाठी दाखल होत आहेत. चौपटीवर एकच गर्दी झाली आहे. सुप्रसिद्ध नवसाला पावणारा अशी ओळख असलेला लालबागचा राजा देखील विसर्जनासाठी मार्गस्थ झालेला आहे. लालबागच्या राजाच्या शेवटच्या दर्शनासाठी भाविकांनी ठिकठिकाणी मोठी गर्दी केलेली दिसत आहे. यावेळी राजावर गुलाल, फुलांची उधळण करण्यात येत आहे.

तर दुसरीकडे पुण्यात देखील मानाचे पाचही गणपती बेलबाग चौकातून लक्ष्मी रोडवर विसर्जन मार्गाला लागले आहेत. सर्व मानाच्या गणपतींची विसर्जन मिरवणूक सुरू झाली असून ढोल ताशाच्या गजरात बाप्पाला निरोप देण्यासाठी भाविकांनी गर्दी केलेली दिसत आहे.