Shiv Sena : शिवसेना कुणाची कधी ठरणार? सुप्रीम कोर्टात आजपासून अंतिम सुनावणी, निकालाकडे राज्याचे लक्ष

Supreme Court final hearing on Shiv Sena bow and arrow symbol case : शिवसेना पक्ष आणि धनुष्यबाण चिन्हासंदर्भातील वादावर आजपासून सर्वोच्च न्यायालयात अंतिम सुनावणी सुरू होत आहे. ही सुनावणी सलग तीन दिवस चालणार आहे. निवडणूक आयोगाने 'शिवसेना' नाव आणि 'धनुष्यबाण' चिन्ह एकनाथ शिंदे गटाला देण्याच्या निर्णय घेतला होता. या निर्णयाच्या विरोधात शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी आव्हान दिले आहे. न्यायमूर्ती सूर्यकांत आणि न्यायमूर्ती जॉयमाल्या बागची यांच्या खंडपीठासमोर हा युक्तिवाद होणार आहे. 'या निवडणुकांपूर्वी हा निकाल आला पाहिजे असेच प्रयत्न आहेत,' असे मत राजकीय विश्लेषकांनी व्यक्त केले आहे. राज्यात स्थानिक स्वराज्य संस्थांच्या निवडणुका जाहीर झाल्या असून, २६ नोव्हेंबरला चिन्ह वाटप होणार असल्याने या निकालाला विशेष महत्त्व प्राप्त झाले आहे. त्यामुळे या सुनावणीकडे संपूर्ण महाराष्ट्राचे लक्ष लागले आहे.