Dombivali : डोंबिवली अंधारात, आठवडाभर सुरुय अघोषित भारनियमन, नागरिक त्रस्त | VIDEO

डोंबिवली परिसरात गेल्या आठवड्यापासून सतत अघोषित वीज खंडित होत असून सुमारे ४ लाख ग्राहकांना याचा फटका बसत आहे. महापारेषणच्या पडघा येथील २२० केव्ही वीज वाहिनीत अडथळे निर्माण झाल्याने वीज यंत्रणा पूर्ववत करण्यात अडचणी येत आहेत. त्यामुळे महावितरणने कोणतीही पूर्वसूचना न देता भारनियमन सुरू केले आहे.

वीजपुरवठ्यातील विस्कळीतपणामुळे नागरिक त्रस्त झाले असून, अनेक सोसायट्यांमध्ये पाणीपुरवठाही विस्कळीत झाला आहे. महापालिकेनेही याबाबत तक्रार नोंदवली आहे. महापारेषणने सहा नवीन टॉवर उभारण्याचे काम युद्धपातळीवर सुरू केले असून, काम शनिवारी पूर्ण झाल्यास रविवारीपासून वीज पुरवठा सुरळीत होण्याची शक्यता आहे.

येथील एमआयडीसी आनंद नगर आणि बाजीप्रभू चौक या विभागाला या अघोषित भार भारनियमनाचा मोठ्या प्रमाणात फटका बसत आहे.दरम्यान, महावितरण आणि महापारेषणने यासंदर्भात कोणतीही स्पष्ट माहिती दिलेली नाही, त्यामुळे नागरिकांमध्ये तीव्र नाराजी आहे.