Congress Meeting : राहुल गांधी राज्यातील कॉंग्रेस नेत्यांशी करणार चर्चा; दिल्लीत महत्वाची बैठक

विधानसभा निवडणुकीच्या पार्श्वभूमीवर आज दिल्लीत कॉंग्रेस नेत्यांची महत्वाची बैठक पार पडणार आहे. या बैठकीसाठी राज्यातील कॉंग्रेसचे सर्व नेते दिल्लीत दाखल झाले आहेत. यात महाराष्ट्र कॉंग्रेसचे प्रभारी रमेश चेन्नीथला, प्रदेशाध्यक्ष नाना पटोले, बाळासाहेब थोरात, विजय वडेट्टीवार, पृथ्वीराज चव्हाण आणि वर्षा गायकवाड यांचा समावेश आहे. यावेळी राज्यातील प्रमुख सहा नेत्यांशी राहुल गांधी आगामी विधानसभेच्या अनुषंगाने चर्चा करणार असल्याची माहिती सूत्रांनी दिली आहे. यावेळी महाविकास आघाडीतील तिढा असलेल्या जागांवरती सुद्धा चर्चा केली जाणार आहे. त्याचबरोबर निवडणुकीच्या जागावाटपाबरोबरच प्रचाराची रणनिती देखील या बैठकीत आखली जाऊ शकते.

दरम्यान, ''महाराष्ट्रात लोकसभेला जश्याप्रकारे आम्ही निर्णय दिला आहे त्यापेक्षा चांगली कामगिरी आम्ही विधानसभेत देखील करू. महाविकास आघाडीच मुख्यमंत्री असेल. जागावाटपाचा तिढा आम्ही सोडवला आहे. काही जागांबद्दल चर्चा होण बाकी आहे, तेही लवकरचं होईल,'' असं प्रदेशाध्यक्ष नाना पटोले यांनी माध्यमांशी बोलताना म्हंटलं आहे.