Nagpur Flash Update : नागपूर पेटलं; दोन गटात तुफान राडा, कारण काय? VIDEO

औरंगजेबाच्या कबरीवरून राज्यभर सुरू असलेल्या वादाचा तीव्र प्रतिसाद नागपूरमध्ये उमटला आहे. महाल परिसरात दोन गटांमध्ये दगडफेक झाली असून, या घटनेत अनेक पोलिस गंभीर जखमी झाले आहेत.

मिळालेल्या माहितीनुसार, संध्याकाळी साडेसातच्या सुमारास एक गट मोठ्या संख्येने चौकाजवळ पोहोचला. या वेळी घोषणाबाजी सुरू झाली. दुपारी झालेल्या विश्व हिंदू परिषदेच्या आंदोलनाच्या पार्श्वभूमीवर या गटाचा रोष होता. घोषणाबाजी सुरू होताच, प्रतिसाद म्हणून दुसऱ्या गटानेही घोषणाबाजी सुरू केली.

तणाव वाढत असल्याचे पाहून पोलिसांनी घटनास्थळी धाव घेतली आणि दोन्ही गटांना वेगवेगळे करण्याचा प्रयत्न केला. त्यानंतर पोलिसांनी जमावाला शिवाजी चौकावरून चिटणीस पार्कच्या दिशेने हलवले. मात्र, चिटणीस पार्कच्या पलीकडे भालदारपुरा परिसरातून पोलिसांवर मोठ्या प्रमाणावर दगडफेक सुरू झाली.

स्थिती नियंत्रणात आणण्यासाठी पोलिसांनी लाठीचार्ज केला, मात्र जमावाने मोठ्या आकाराचे दगड फेकल्याने पोलिसांना अश्रूधाराच्या नळकांड्या (टिअर गॅस) वापरण्याची वेळ आली. या दगडफेकीत अनेक गाड्यांचे मोठ्या प्रमाणात नुकसान झाले आहे. मिळालेल्या माहितीनुसार, जमावाने एका क्रेनलाही आग लावली. ही आग इतकी भडक होती की अग्निशमन दलाच्या जवानांची देखील हिमत होत नव्हती.

सध्या पोलिसांनी परिस्थिती आटोक्यात आणण्यासाठी मोठा बंदोबस्त तैनात केला असून, शहरात शांतता राखण्याचे आवाहन करण्यात आले आहे.