VIDEO : 'एक मैं और एक तू... ', जेव्हा अमित ठाकरे गाणं गातात | Marathi News

विधानसभा निवडणुकीच्या रिंगणात माहीमची निवडणूक कसोटीची ठरणार आहे. याठिकाणी मनसे अध्यक्ष राज ठाकरे यांचे पुत्र अमित ठाकरे हे पहिल्यांदाच निवडणूक लढवत आहेत. त्यामुळे त्यांना माहीमच्या जनतेची किती पसंती मिळेल याकडे आता सगळ्यांचं लक्ष लागलं आहे. सध्या मात्र अमित ठाकरे आपल्या आगळ्यावेगळ्या प्रचाराच्या शैलीसाठी चर्चेत आहेत. कधी फुटबॉल खेळणारे, तर कधी विनाचप्पल अनवाणी प्रचार करत घरोघरी फिरणारे अमित ठाकरे नुकतेच एका पार्कमध्ये ज्येष्ठ मंडळींसोबत गाणं गाताना बघायला मिळाले आहेत. प्रचाराच्या तापलेल्या वातावरणामध्ये विरंगुळा म्हणून माहीम विधानसभेचे मनसेचे उमेदवार अमित राज ठाकरे यांनी चक्क गाणं गायलं आहे. दादर येथील एका पार्कमध्ये अमित ठाकरे यांनी एक मैं और एक तू... हे गाणं गाऊन उपस्थित असलेल्या ज्येष्ठ नागरिकांची मन जिंकली. त्यामुळे ठाकरेंच्या कुटुंबातील आणखीन एक सुप्त गुण यानिमित्ताने दिसून आला. सध्या त्यांचा हा गाण्याचा व्हिडिओ सोशल मिडियावर व्हायरल होत आहे.

Edited By Rakhi Rajput