Dadar News : दादरच्या हनुमान मंदिरात महाआरती; काय म्हणाले संजय राऊत, पाहा Video

दादरमधल्या हनुमान मंदिराला रेल्वे प्रशासनाने दिलेल्या नोटिस प्रकरणी ठाकरेंनी एल्गार पुकारला आहे. दादरच्या या हनुमान मंदिरात आज संध्याकाळी महाआरती केली जाणार आहे. या महाआरतीमध्ये आदित्य ठाकरे, संजय राऊत तसंच ठाकरेसेनेचे कार्यकर्ते उपस्थित राहणार आहेत. याबद्दल बोलताना खासदार संजय राऊत यांनी शिवसेनेनेच भाजपला हिंदुत्व शिकवलं असल्याचा दावा केला आहे. तर भाजपमध्ये हिम्मत असेल तर त्यांनी स्वातंत्र्यवीर सावरकरांना भारतरत्न द्यावं, असं आव्हान देखील राऊत यांनी केलं आहे.

यावेळी बोलताना संजय राऊत म्हणाले की, दादरला 80 वर्षांपूर्वी रेल्वे स्टेशनवर हमालांनी मंदिर बांधलं. तेव्हापासून कोणतीही अडचणी आलेली नाही. हा मजुरांचा देव आहे. आज संध्याकाळी साडेचार ते पाच वाजता तिथे महाआरती होणार आहे. आदित्य ठाकरे आणि मी, स्थानिक आमदार महेश सावंत तसंच हजारो शिवसैनिक त्या ठिकाणी महाआरती करणार आहे. तर भारतीय जनता पक्षाची इच्छा असेल तर हिंदू म्हणून त्यांनी देखील या आरतीला यावं. त्यांच्या हातात आम्ही गदा आणि घंटा देऊ. मात्र त्यांना हिंदुत्व कळत नसल्याचा आरोप देखील राऊत यांनी केला आहे.