Vinesh Phogat: विनेश फोगाटने अंतिम डाव टाकला! अपात्रतेच्या निर्णयाविरोधात CAS कडे मागितली दाद

भारतीय कुस्तीपटू विनेश फोगाटने पॅरिस ऑलिम्पिक स्पर्धेतील ५० किलो ग्रॅम वजनी गटातील फ्री स्टाईल कुस्ती प्रकारात फायनलमध्ये प्रवेश केला होता. मात्र फायनलच्या सामन्यापूर्वी १०० ग्रॅम वजन अधिक असल्याने तिला अपात्र ठरवण्यात आलं. त्यामुळे पदकाची दावेदार असलेल्या विनेशला रिकाम्या हाती परतावं लागलं आहे. त्यामुळे देशभरातून तिला न्याय मिळवून देण्याची मागणी जोर धरू लागली आहे. दरम्यान इंडिया टुडेने दिलेल्या वृत्तानुसार, विनेशने कोर्ट ऑफ आर्बिट्रेशन फॉर स्पोर्ट्स (CAS) कडे अपील केले आहे.

विनेश फोगाटने पॅरिस ऑलिम्पिक २०२४ स्पर्धेत शानदार खेळ करून दाखवला. तिने वर्ल्ड नंबर १ खेळाडूला पराभूत करत फायनलमध्ये प्रवेश केला होता. मात्र ५० किलो ग्रॅम वजनी गटात केवळ १०० ग्रॅम वजन अधिक असल्याने तिला अपात्र घोषित करण्यात आलं आहे.

सिल्व्हर मेडल देण्याची केली मागणी

इंडिया टुडेने दिलेल्या वृत्तानुसार, विनेश फोगाटने सिल्व्हर मेडल देण्याची मागणी केली आहे. याबाबत कोर्ट ऑफ आर्बिट्रेशन फॉर स्पोर्ट्स आज (८ ऑगस्ट) निर्णय देऊ शकतो, असे म्हटले जात आहे. कोर्ट ऑफ आर्बिट्रेशन फॉर स्पोर्ट्सने निर्णय दिला आणि हा निर्णय जर विनेश फोगटच्या बाजूने लागला तर आंतरराष्ट्रीय ऑलिम्पिक असोसिएशनला विनेश फोगाटला संयुक्त सिल्व्हर मेडल द्यावं लागेल.