Virat Kohli: व‍िराट कोहलीचा चमत्कारिक षटकार; अख्खा क्रिकेट करिअरमध्ये दुसऱ्यांदा घडलं असं|Video Viral

रांची येथील रायपूरमध्ये भारतविरुद्ध दक्षिण आफ्रिकेच्या संघात दुसरा एकदिवसीय सामना खेळला जातोय. या सामन्यात भारतीय संघानं प्रथम फलंदाजी केली. टीम इंडियाने ३५९ धावा करत आफ्रिकेच्या संघासमोर ३६० धावांचे आव्हान ठेवलंय. धावांचा डोंगर उभारताना कोहलीनं विराट खेळी खेळत सलग दुसरं शतकं केलंय. या दुसऱ्या शतकासह विराट कोहलीनं आपल्या एकदिवसीय क्रिकेटच्या करिअरमधील ५३ वे शतक पूर्ण केलं.

त्याचबरोबर त्याने दक्षिण आफ्रिकेच्या संघाविरुद्धात ७वे शतक पूर्ण केलंय. आजच्या सामन्यात फलंदाजीसाठी आल्यानंतर विराट कोहलीनं अद्भूत असा षटकार मारला. असा षटकार त्याने आपल्या करिअरमध्ये दुसऱ्यांदा मारलाय. किंग कोहलीने रायपूर एकदिवसीय सामन्यात षटकार मारत आपल्या धावांचे खाते उघडले. त्याने लुंगी एनगिडीच्या चेंडूवर फाइन लेगवर षटकार मारला. विराट कोहलीनं ९३ चेंडूत दोन षटकार आणि सात चौकारांसह १०२ धावा केल्या. लुंगी एनगिडीच्या चेंडूवर एडेन मार्करामने त्याला झेलबाद केले.

दरम्यान कोहलीच्या एकदिवसीय कारकिर्दीत षटकार मारून खाते उघडण्याची ही त्याची दुसरी वेळ आहे. विराटने आधी २०१३ मध्ये वेस्ट इंडिजविरुद्ध असा कारनामा केला. तेव्हा कोहलीनं टिनो बेस्टला षटकार ठोकला होता. कोहलीने किंग्स्टन येथे वेस्ट इंडिजविरुद्धच्या एकदिवसीय सामन्यात षटकार मारून आपले खाते उघडले होते. त्यानंतर त्याने बेस्टला डीप बॅकवर्ड पॉइंटने फटका मारत षटकार मारला. त्या सामन्यात ११ धावा काढल्यानंतर कोहलीला डॅरेन सॅमीनं झेलबाद केलं होतं.

रायपूर एकदिवसीय सामन्यात कोहलीने भारतीय डावाच्या सहाव्या षटकाच्या शेवटच्या चेंडूवर षटकार मारला.याआधी विराट कोहलीने तीन चेंडू विनाधाव खेळले. कोहलीने एनगिडीच्या १३२ किमी प्रतितास वेगाने फेकलेल्या चेंडूला सीमेरेषे पार परतवून लावला. एनगिडीनं लेग स्टंपच्या लाईनवर टाकला होता. षटकार मारल्यानंतर विराटनं चौकार मारला.

कोहलीने एकदिवसीय क्रिकेटमध्ये किती षटकार मारलेत?

कोहलीने एकदिवसीय क्रिकेटमध्ये १६१ षटकार मारलेत. एकदिवसीय सामन्यात सर्वाधिक षटकार मारणाऱ्या भारतीय फलंदाजांच्या यादीत विराट पाचव्या स्थानी आहे. पहिल्या स्थानी रोहित शर्मा (३५२), त्यानंतर एमएस धोनी (२२९),तिसऱ्या स्थानी सचिन तेंडुलकर (१९५) त्यानंतर सौरव गांगुलीचा नंबर असून त्याने (१९०) षटकार मारलेत.