T20 World Cup IND vs ENG: इंग्लंडविरुद्धच्या सामन्यात नेमकं काय चुकलं? पराभवाची कारणं समजून घ्या

T20 World Cup : टीम इंडियाचा पराभव करत इंग्लंडने फायनलमध्ये धडक मारली आहे. इंग्लंडने 169 धावांचे लक्ष्य एकही विकेट न गमावता पूर्ण केले. प्रथम फलंदाजी करताना भारताने 20 षटकांत 6 बाद 168 धावा केल्या. इंग्लंड संघाने 16 षटकात एकही बाद 170 धावा केल्या. इंग्लंडकडून अॅलेक्स हेल्सने 47 चेंडूत नाबाद 86 धावा केल्या.

कर्णधार जोस बटलरने 49 चेंडूत 80 धावा केल्या. भारताच्या सहापैकी चार गोलंदाजांनी 10 पेक्षा जास्त इकॉनॉमी रेटने धावा दिल्या. भारताचा पराभवाचं कोट्यवधी भारतीयांना दु:ख आहे. मात्र आजच्या पराभवाची नेमकी कारणं हे देखील तपासणं गरजेचं आहे.  (Cricket News)

संथगतीने धावा

टीम इंडियाची ओपनिंग जोडी सुपर-12 मध्ये अपयशी ठरली होती आणि उपांत्य फेरीतही तीच अवस्था दिसून आली. अवघ्या 9 धावा असताना केएल राहुल बाद झाला. त्यानंतर टीम इंडियाने संथ गतीने फलंदाजी केली. याचा फटका असा बसला की पॉवरप्लेमध्ये भारताला केवळ 38 धावा करता आल्या. तसेच हार्दिक पांड्याने शेवटी तुफान फडकेबाजी केली नसती तरी धावसंख्या आणखी कमी दिसली असती.

रोहित-सूर्या फेल

कर्णधार रोहित शर्माची बॅट संपूर्ण T20 विश्वचषकात शांत राहिली आणि उपांत्य फेरीतही तेच दिसले. रोहितने 28 चेंडूत 27 धावा केल्या, त्याचा स्ट्राईक रेट 100 पेक्षा कमी होता. दुसरीकडे सूर्यकुमार यादवने 10 चेंडूत 14 धावा केल्या. दोघांकडूनही चांगळ्या खेळीची अपेक्षा होती.

गोलंदाजांची सुमार कामगिरी

सुपर-12 मध्ये शानदार गोलंदाजी करणाऱ्या अर्शदीप सिंग आणि भुवनेश्वर कुमार यांनी उपांत्य फेरीत निराशा केली. पॉवरप्लेमध्ये दोघांना एकही विकेट घेता आली नाही तसेच धावाही रोखता आल्या नाहीत. भुवनेश्वर कुमारचा इकॉनॉमी रेट 10 पेक्षा जास्त होता. शमी, अश्विन आणि पांड्या यांनीही प्रत्येक षटकात 10 पेक्षा जास्त धावा दिल्या.

प्लेअर्सची निवड चुकली

टीम इंडियाच्या प्लेइंग इलेव्हनची निवड हेही कुठेतरी पराभवाचे कारण होते. भारताने विकेट घेणाऱ्या फिरकीपटूला प्लेइंग इलेव्हनमध्ये स्थान दिले नाही. अक्षर पटेलला संधी देण्यात आली, जो फक्त धावा रोखण्याचे काम करतो, युझवेंद्रला संपूर्ण स्पर्धेत संधी देण्यात आली नाही, याचा देखील टीम इंडियाला फटका बसला आहे.