Rohit Sharma: अरे ट्रॉफी तर घेऊन जा..आता तर रोहितने हद्दच पार केली; VIDEO पाहून हसून हसून पोट दुखेल

संपूर्ण क्रिकेट विश्वात एकच चर्चा रंगली आहे, ती म्हणजे भारतीय संघाच्या ऐतिहासिक विजयाची. भारतीय संघाने आयसीसी चॅम्पियन्स ट्रॉफीतील फायनलमध्ये न्यूझीलंडला पराभूत करत जेतेपदाची ट्रॉफी उंचावली.

रोहित शर्माच्या नेतृत्वाखाली खेळणाऱ्या भारतीय संघाने तिसऱ्यांदा हा कारनामा करून दाखवला आहे. त्यामुळे ठिकठिकाणी भारतीय संघाच्या विजयाचा जल्लोष पाहायला मिळाला. दरम्यान रोहित शर्माने पत्रकार परिषदेत असं काही केलं ज्याचा व्हिडिओ सध्या सोशल मीडियावर तुफान व्हायरल होऊ लागला आहे.

रोहित शर्मा गोलंदाजांची धुलाई करण्यासाठी ओळखला जातो. त्याची वेगळी ओळख सांगायची झाली, तर तो अनेकदा गोष्टी विसरतो. त्याचे अनेक व्हिडिओ व्हायरल झाले आहेत, ज्यात तो कधी मोबाईल तर कधी पासपोर्ट विसरला आहे. मात्र यावेळी तो चक्क आयसीसीची ट्रॉफी विसरला आहे. हा मजेशीर व्हिडिओ सध्या सोशल मीडियावर तुफान व्हायरल होतोय.

तर झाले असे की, भारतीय संघाने चॅम्पियन्स ट्रॉफीवर नाव कोरल्यानंतर, खेळाडू जोरदार जल्लोष करत होते. त्यावेळी रोहित शर्माने पत्रकार परिषदेत सहभाग घेतला. रोहितने पत्रकारांच्या प्रश्नांची उत्तरं दिली. मात्र जेव्हा निघायची वेळ आली तेव्हा तो ट्रॉफी तिकडेच विसरून पुढे जायला निघाला. त्यानंतर त्याला सांगावं लागलं की, ट्रॉफी तरी घेऊन जा..’ या मजेशीर व्हिडिओवर नेटकरीही मजेशीर प्रतिक्रिया देताना दिसून येत आहेत.

भारताचा शानदार विजय

या सामन्याबद्दल बोलायचं झालं तर, या हाय व्होल्टेज सामन्यात न्यूझीलंडने नाणेफेक जिंकून प्रथम फलंदाजीचा निर्णय घेतला. प्रथम फलंदाजी करताना न्यूझीलंडच्या फलंदाजांना २५१ धावांपर्यंत मजल मारता आली. न्यूझीलंडकडून डॅरील मिचेलने ६४ तर मायकल ब्रेसवेलने ५३ धावा केल्या. या धावांचा पाठलाग करताना कर्णधार रोहित शर्माने शानदार ७६ धावांची खेळी केली. या खेळीच्या बळावर भारतीय संघाने ४ गडी राखून विजय मिळवला.