USA vs Canada:कॅनडा विरुद्ध अमेरिका सामन्यात खेळाडूंचा हिंदी भाषेत मजेशीर संवाद ,Video व्हायरल

आयसीसी टी-२० वर्ल्ड कप २०२४ स्पर्धेतील पहिला सामना यजमान अमेरिका आणि कॅनडा या दोन्ही संघांमध्ये पार पडला. या रोमांचक सामन्यात यजमान अमेरिकेने कॅनडाचा चांगलाच पाहुणचार केला. १९५ धावांचा पाठलाग करताना अमेरिकेने १७.४ षटकात आव्हान पूर्ण केलं आणि स्पर्धेतील पहिल्या विजयाची नोंद केली. दरम्यान या सामन्यानंतर एक व्हिडिओ सोशल मीडियावर तुफान व्हायरल होतोय.

हा सामना कॅनडा आणि अमेरिका या दोन्ही संघांमध्ये सुरू होता. मात्र खेळाडू इंग्रजी नव्हे तर हिंदी भाषेत संवाद साधताना दिसून आले. व्हायरल होत असलेल्या व्हिडिओमध्ये तुम्ही पाहू शकता की , अमेरिकेला गोलंदाज हरमीत सिंग गोलंदाजी करतोय. तर कर्णधार मोनांक पटेल त्याच्याशी हिंदी भाषेत संवाद साधताना दिसून येत आहे. अमेरिका संघात भारतीय मुळचे खेळाडू आहेत. त्यामुळे ते हिंदीत संवाद साधतात. या संवादाचा व्हिडिओ सध्या सोशल मीडियावर व्हायरल होतोय.

या सामन्याबद्दल बोलायचं झालं तर, कॅनडाचा संघ प्रथम फलंदाजी करण्यासाठी मैदानावर आला. प्रथम फलंदाजी करताना कॅनडाने २० षटकअखेर ५ गडी बाद १९४ धावा केल्या. कॅनडाकडून फलंदाजी करताना नवनीत धालीवालने ४४ चेंडूत ३ षटकार आणि ६ चौकारांच्या मदतीने ६१ धावा चोपल्या.

अमेरिकेला हा सामना जिंकण्यासाठी १९५ धावा करायच्या होत्या. या धावांचा पाठलाग करताना आरोन जोन्स विक्रमी १० षटकार खेचत नाबाद ९४ धावांची खेळी केली. तर गौसने ६५ धावांचे योगदान दिले. हा सामना अमेरिकेने ७ गडी राखून जिंकला.