IML 2025: टीम इंडियाकडे आणखी एक ट्रॉफी जिंकण्याची संधी; फायनलमध्ये या संघासोबत भिडणार

भारतीय क्रिकेट संघाने गेल्या वर्षभरात २ मोठ्या ट्रॉफीवर आपलं नाव कोरलं आहे. आयसीसी टी२० वर्ल्डकप स्पर्धेतील फायनलमध्ये भारतीय संघाने दक्षिण आफ्रिकेला पराभूत करत जेतेपदाची ट्रॉफी उंचावली.

तर चॅम्पियन्स ट्रॉफी स्पर्धेत न्यूझीलंडला पराभूत करत जेतेपदाचा मान पटकावला. आता भारतीय संघाकडे आणखी एक ट्रॉफी जिंकण्याची संधी आहे. कोणती आहे ती ट्रॉफी? आणि केव्हा होणार फायनल? जाणून घ्या.

भारतीय संघाकडे आणखी एक ट्रॉफी जिंकण्याची संधी..

दिग्गज भारतीय खेळाडूंचा संघ इंटरनॅशनल मास्टर्स लीग स्पर्धा खेळण्यासाठी मैदानात उतरला आहे. या स्पर्धेत जगातील ५ संघांनी सहभाग घेतला. ज्यात भारतासह , दक्षिण आफ्रिका, ऑस्टेलिया, इंग्लंड आणि श्रीलंका या संघांचा समावेश आहे. या स्पर्धेतील सेमीफायनलमध्ये भारतीय संघाने ऑस्ट्रेलियाला पराभूत करत फायनलमध्ये प्रवेश केला आहे.

या सामन्यात भारतीय संघाने एकतर्फी विजयाची नोंद केली. तर दुसरीकडे वेस्टइंडिज आणि श्रीलंका या दोन्ही संघांमध्ये दुसऱ्या सेमीफायनलचा सामना पार पडला. या सामन्यात वेस्टइंडिजने विजय मिळवत फायलनचं तिकीट मिळवलं.

दोन्ही संघ फायनल खेळण्यासाठी सज्ज झाले असून हा सामना १६ मार्चला रायपूरच्या शहीद वीर नारायण सिंग आंतरराष्ट्रीय स्टेडियममध्ये होणार आहे. या सामन्याला भारतीय वेळेनुसार, संध्याकाळी ७:३० वाजता सुरु होईल.

वेस्टइंडिजचा दमदार विजय

दुसऱ्या सेमीफायनल सामन्याबद्दल बोलायचं झालं, तर या सामन्यात वेस्टइंडिज मास्टर्स आणि श्रीलंका मास्टर्स हे दोन्ही संघ आमनेसामने आले होते. या सामन्यात श्रीलंका मास्टर्सने नाणेफेक जिंकला आणि प्रथम गोलंदाजीचा निर्णय घेतला.

या सामन्यात वेस्टइंडिज मास्टर्सने प्रथम फलंदाजी करताना २० षटकअखेर ५ गडी बाद १७९ धावा केल्या. या सामन्यात कर्णधार ब्रायन लाराने ४१ धावांची खेळी केली. तर रामदीनने २२ चेंडूंचा सामना करत ५० धावांची खेळी केली.

श्रीलंका मास्टर्सला हा सामना जिंकण्यासाठी २० षटकात १८० धावा करायच्या होत्या. या धावांचा पाठलाग करण्यासाठी आलेल्या श्रीलंकेला १७३ धावांपर्यंत मजल मारता आली. श्रीलंकेकडून फलंदाजी करताना, गुणरत्नेने सर्वाधिक ६६ धावांची खेळी केली. मात्र इतर कुठल्याही फलंदाजाला मोठी खेळी करता आली नाही.