आयसीसी टी-२० वर्ल्डकप २०२४ स्पर्धेचा काऊंटडाऊन सुरु झाला आहे. येत्या १ जूनपासून या स्पर्धेला प्रारंभ होणार आहे. भारतीय संघ आपला पहिला सामना ५ जून रोजी आयर्लंडविरुद्ध खेळणार आहे. ही स्पर्धा सुरु होण्यापूर्वी अनेक दिग्गज खेळाडूंनी टॉप ४ संघांची निवड केली आहे. दरम्यान वेस्टइंडिजचे माजी क्रिकेटपटू ब्रायन लारा यांनी सर्वांनाच आश्चर्यचकीत करणारं नाव घेतलं आहे.
ब्रायन लारा यांच्या मते अफगाणिस्तानचा टी-२० वर्ल्डकप २०२४ स्पर्धेच्या सेमीफायनलमध्ये प्रवेश करु शकतो. आयसीसी वनडे वर्ल्डकप स्पर्धेत अफगाणिस्तानने शानदार कामगिरी केली होती. या संघाने पाकिस्तान, श्रीलंका आणि इंग्लंडला पराभूत करत सर्वांनाच आश्चर्याचा धक्का दिला होता. त्यामुळे अफगाणिस्तानला हलक्यात घेऊन चालणार नाही. आता कोणते ४ संघ सेमीफायनलमध्ये जाणार हे पाहणं महत्वाचं ठरणार आहे.
आयपीएल २०२४ स्पर्धा सुरु होण्यापूर्वी भारत आणि अफगाणिस्तान या दोन्ही संघांमध्ये ३ टी-२० सामन्यांची मालिका पार पडली. या मालिकेतील सुरुवातीच्या दोन्ही सामन्यांमध्ये भारतीय संघाने सहज विजय मिळवला. मात्र तिसऱ्या सामन्यात अफगाणिस्तानचा संघ विजयाच्या अगदी जवळ पोहोचला होता. शेवटी या संघाला पराभवाचा सामनी करावा लागला.
या सामन्याबद्दल बोलायचं झालं, तर भारत आणि अफगाणिस्तान यांच्यातील तिसरा सामना चेन्नईतील एमए चिंदबरम स्टेडियमवर पार पडला होता. या सामन्यात भारतीय संघाने प्रथम फलंदाजी करताना २० षटकअखेर ४ गडी बाद २१२ धावा केल्या होत्या. या धावांचा पाठलाग करताना अफगाणिस्तानच्या फलंदाजांनी तुफान फटकेबाजी केली आणि हा सामना बरोबरीत संपवला.
त्यानंतर सुपर ओव्हर झाली. पहिली सुपर ओव्हरही बरोबरीत समाप्त झाली. त्यानंतर दुसऱ्या सुपर ओव्हरमध्ये भारतीय संघाने विजय मिळवला. त्यामुळे अफगाणिस्तानचा संघ आता कशी कामगिरी करणार हे पाहणं महत्वाचं ठरणार आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.