Pakistan Cricket Team: ICC मुळे पाकिस्तानचा संघ सुपर 8 मध्ये पोहचू शकला नाही,माजी कर्णधाराचा मोठा आरोप

भारत आणि पाकिस्तान या दोन्ही संघांचा आयसीसी टी-२० वर्ल्डकप २०२४ स्पर्धेसाठी अ गटात समावेश करण्यात आला होता. भारतीय संघाने सुपर ८ मध्ये प्रवेश केला आहे. तर पाकिस्तानचा संघ सुपर ८ च्या शर्यतीतून बाहेर पडला आहे. पाकिस्तानला सुरुवातीच्या दोन्ही सामन्यांमध्ये पराभवाचा सामना करावा लागला होता.

पहिल्या सामन्यात नवख्या अमेरिकेने पाकिस्तानला पराभूत केलं. तर दुसऱ्या सामन्यात भारतीय संघाने पाकिस्तानला धूळ चारली. या सुमार कामगिरीनंतर बाबर आझमसह संपूर्ण संघावर जोरदार टीका केली गेली. दरम्यान संघाचा माजी कर्णधार राशिद लतीफने पाकिस्तान संघाला समर्थन करत आयसीसीला दोषी ठरवलं आहे.

क्रिकबझसोबत बोलताना राशिद लतीफ म्हणाले की, ' तुम्ही प्रत्येक गोष्टीसाठी पाकिस्तान संघाला दोषी ठरवू शकत नाही. त्यांनी चांगली कामगिरी केली आहे. मात्र खेळपट्टी आणि परिस्थितीने त्यांची मेहनत वाया घालवली आहे. त्यांना भारत आणि पाकिस्तानविरुद्ध झालेले दोन्ही सामने जिंकायचे होते. मात्र परिस्थिती त्यांच्या हातात नव्हती. इथे धावा करणं खूप कठीण होतं. तुन्ही पाहा ना विराट कोहलीसारखा फलंदाजही इथे धावा करु शकत नाहीये.'

राशिद लतीफच्या मते,आयसीसीमुळे पाकिस्तानचा संघ टी-२० वर्ल्डकपच्या सुपर ८ मध्ये पोहचू शकलेला नाही. ते म्हणाले की, ' केवळ अमेरिकेतच नव्हे तर परिस्थिती ही वेस्टइंडिजमध्येही खराबच आहे. वैयक्तिक अर्धशतकांची संख्या खूप कमी आहे. कुठल्याच संघाने अफगाणिस्तानविरुद्ध खेळताना अर्धशतक झळकावलेलं नाही. जर संघातील फलंदाजाने अर्धशतक झळकावलं, तर तो संघ जिंकायचा चान्स अधिक असतो. रिषभ पंतने ४२ धावांची खेळी केली आणि भारतीय संघाने पाकिस्तानला पराभूत केलं. ही परिस्थिती वर्ल्डकप खेळण्यासाठी अनुकूल नाही.'

या संपूर्ण स्पर्धेत पाकिस्तान संघाचा फ्लॉप शो पाहायला मिळाला आहे. पहिल्याच सामन्यात पाकिस्तानला अमेरिकेकडून सुपर ओव्हरमध्ये पराभवाचा सामना करावा लागला होता. तर दुसऱ्या सामन्यात भारतीय संघाने पाकिस्तानला पराभूत केलं.