डोक्याला २० टाके, खांदा फ्रॅक्चर; ३ क्रिकेटपटूंचा प्रशिक्षकावर जीवघेणा हल्ला, क्रीडाविश्वात खळबळ

Cricket Coach Attacked : क्रिकेट विश्वातून मोठी बातमी हाती आली आहे. क्रिकेट असोसिएशन ऑफ पाँडेचेरीशी संबंधित वृत्त समोर आलं आहे. पाँडेचेरीशीमध्ये अंडर-१९ टीमचा कोचवर सोमवारी तीन स्थानिक क्रिकेटपटूंनी हल्ला केला आहे. या हल्ल्यात कोचच्या डोक्याला २० टाके पडले आहेत. तर खांदा फ्रॅक्चर झाला आहे. या प्रकरणी पोलिसांत एफआयआर नोंदवण्यात आली आहे.

क्रिकेट असोसिएशन ऑफ पाँडेचेरीच्या अंडर १९ हेड कोच एस वेंकटरमन यांच्यावर तीन खेळाडूंनी रागाच्या भरात तिघांनी हल्ला केला. मीडिया रिपोर्टनुसार, सैयद मुश्ताक अली ट्रॉफीसाठीच्या संघात स्थान न मिळाल्याने तीन खेळाडू भडकले. माजी CAP सचिव वेंकटरमन यांच्या डोक्याला मोठी दुखापत झाली आहे. त्यांच्या खांद्याला देखील मोठी दुखापत झालीये.

तिन्ही खेळाडूंनी सोमवारी सकाळी ११ वाजता कोचवर जीवघेणा हल्ला केला. या प्रकरणी सेदरापेट पोलीस स्टेशनमध्ये एफआयआर नोंदवण्यात आली आहे. सब-इन्स्पेक्टर आर राजेश यांनी या घटनेला दुजोरा दिला आहे. डोक्याला गंभीर दुखापत झालेल्या कोचची प्रकृती सध्या स्थिर आहे.

एस वेंकटरमन यांनी हल्ला करणाऱ्या तीन खेळाडूंच्या नावाची तक्रार पोलीस स्टेशनला दिली. यात वरिष्ठ खेळाडू कार्तिकेयन जयासुंदरम, फर्स्ट क्लास श्रेणीतील ए अरविंदाराज आणि एस संतोष कुमारन यांच्या विरोधात तक्रार नोंदवण्यात आली आहे. या प्रकरणात भारतीदासन पाँडेचेरी क्रिकेटर्स फोरमचे सचिव जी चंद्रन यांच्यावर गंभीर आरोप करण्यात आले आहेत. टी२०- संघात निवड न झाल्याने तिघांनी हल्ला केल्याचं तक्रारीत म्हटलं आहे.

तिघांनी कोचवर हत्या करण्याच्या दृष्टीनेच हल्ला केल्याचा आरोप आहे. तिन्ही खेळाडूंनी चंद्नन यांच्या सांगण्यावरून मारहाण केल्याचा आरोप आहे. तुला जीवे मारून टाकू, अशीही धमकी तिघांनी दिली. परंतु भारतीदासन पुडुचेरी क्रिकेटर्स फोरमने कोचचे आरोप फेटाळून लावले आहेत.