KKR Captain: केकेआरचा कॅप्टन ठरला? या अनुभवी खेळाडूला मिळणार मोठी जबाबदारी?

आयपीएल २०२५ स्पर्धेसाठी कोलकाता नाईट रायडर्सने मजबूत संघ निवडला आहे. मात्र कर्णधार कोण असेल , हे अजूनही ठरलेलं नाही. गेल्या हंगामात श्रेयस अय्यर या संघाचं नेतृत्व करताना दिसून आला होता.

त्याच्या नेतृत्वाखाली खेळताना कोलकाता नाईट रायडर्सने आयपीएलची ट्रॉफी उंचावली होती. मात्र या हंगामात कोलकाताने त्याला रिलीज करण्याचा निर्णय घेतला. त्यानंतर लिलावात त्याला खरेदी करता आलं नव्हतं. त्यामुळे कोलकाताचा संघ कर्णधाराच्या शोधात आहे.

सौदी अरेबियातील जेद्दाहमध्ये आयपीएल २०२५ स्पर्धेचा लिलाव सोहळा पार पडला. या लिलावात श्रेयस अय्यर हातून निघाला पण वेंकटेश अय्यरला कोलकाताने २३.७५ कोटींची बोली लावली आणि आपल्या संघात कायम ठेवलं.

तेव्हापासून वेंकटेश अय्यर कोलकाताचा कर्णधार होणार असल्याची चर्चा सुरू झाली आहे. मात्र आता वेगळीच चर्चा सुरू झाली आहे. माध्यमातील वृत्तानुसार, अजिंक्य रहाणे कोलकाता नाईट रायडर्स संघाचा पुढील कर्णधार होऊ शकतो. अजिंक्य रहाणेला या लिलावात १.५० कोटींच्या बेस प्राईजवर खरेदी केलं होतं.

अनुभवी कर्णधार

रहाणेला संघाचं नेतृत्व करण्याचा दांडगा अनुभव आहे. त्याने भारतीय संघाचं नेतृत्व करत संघाला विजय मिळवून दिला आहे. त्याच्या नेतृत्वाखाली मुंबईने रणजी ट्रॉफी स्पर्धा जिंकली. यासह तो राजस्थान रॉयल्स संघाचा कर्णधार देखील होता. त्यामुळे कोलकाता नाईट रायडर्सचा संघ रहाणेकडे नेतृत्वाची धुरा देण्याचा नक्कीच विचार करू शकतो.

एका सूत्राने दिलेल्या माहितीनुसार, रहाणेकडे कर्णधारपद सोपवलं जाण्याची शक्यता ही ९० टक्के इतकी आहे. कर्णधारपदाचा पर्याय म्हणून रहाणेचा संघात समावेश करण्यात आला होता. त्यामुळे अजिंक्य रहाणे पुन्हा एकदा कर्णधाराच्या भूमिकेत दिसून येऊ शकतो.