IND vs BAN: बांगलादेश संघाची घोषणा, स्टार खेळाडूला बसवलं; पाकिस्तानला हरवले, आता टीम इंडियाला टक्कर देणार!

Bangladesh Test Squad, IND vs BAN: भारत आणि बांगलादेश या दोन्ही संघांमध्ये २ कसोटी सामन्यांच्या मालिकेचा थरार रंगणार आहे. या मालिकेसाठी बांगलादेशने आपला संघ जाहीर केला आहे. या मालिकेत नजमुल हुसेन शांतो बांगलादेश संघाचं नेतृत्व करताना दिसून येणार आहे.

तसेच या मालिकेसाठी जाकीर अलीला देखील संधी देण्यात आली आहे. तर शोरफुल इस्लामला संघाबाहेर करण्यात आलं आहे. भारत आणि बांगलादेश हे दोन्ही संघ १९ सप्टेंबरला आपला पहिला कसोटी सामना खेळण्यासाठी मैदानात उतरणार आहे.

बांगलादेश संघाने काही दिवसांपूर्वीच पाकिस्तानला पाकिस्तानात जाऊन पराभूत केलं आहे. मात्र भारतीय संघाला भारतात येऊन हरवणं बांगलादेश संघासाठी सोपं नसणार आहे. भारतीय संघाला आव्हान देण्यासाठी बांगलादेशने युवा आणि अनुभवी खेळाडूंना संघात स्थान दिलं आहे.

या खेळाडूंना मिळालं स्थान

भारतीय संघाविरुद्ध होणाऱ्या कसोटी मालिकेसाठी जाकीर हसन, शादमान इस्लाम, मोमिनुल हक आणि महमुदुल हसन यांना देखील संघात स्थान देण्यात आलं आहे. या मालिकेसाठी बांगलादेशने नवख्या खेळाडूला स्थान दिलं आहे. जाकीर अली पहिल्यांदाच बांगलादेशकडून खेळताना दिसणार आहे. तो पहिल्यांदाच खेळण्यासाठी मैदानात येणार असला, तरीदेखील त्याला देशांतर्गत क्रिकेट खेळण्याचा बराच अनुभव आहे.

भारतीय संघाविरुद्ध होणाऱ्या कसोटी मालिकेसाठी असा आहे बांगलादेशचा संघ:

नजमुल हुसेन शांतो (कर्णधार), महमुदुल हसन जॉय, जाकीर हसन, शादमान इस्लाम, मोमिनुल हक, मुश्फिकुर रहीम, शाकिब अल हसन,नईम हसन, नाहिद राणा, हसन महमूद, तस्कीन अहमद, सैयद खालिद अहमद, जेकर अली अनिक, लिटन दास, मेहदी हसन मिराज, तैजुल इस्लाम.

मालिकेतील पहिल्या सामन्यासाठी असा आहे भारतीय संघ:

रोहित शर्मा (कर्णधार), यशस्वी जयस्वाल, शुभमन गिल, विराट कोहली, केएल राहुल, सरफराज खान, रिषभ पंत (यष्टिरक्षक), ध्रुव जुरेल (यष्टिरक्षक), आर अश्विन, रविंद्र जडेजा, अक्षर पटेल, कुलदीप यादव, मोहम्मद सिराज, आकाश दीप, जसप्रीत बुमराह आणि यश दयाल.