Death : शटलकॉक घ्यायला गेला अन् खाली कोसळला, बॅडमिंटन खेळताना २५ वर्षीय तरुणाचा मृत्यू

Shocking : काही दिवसांपूर्वी एका तरुणाचा क्रिकेट खेळताना मृत्यू झाला होता. तरुणाने षटकार मारला आणि तो खाली पडला. मित्र जवळ गेल्यानंतर तरुणाचा मृत्यू झाल्याचे उघडकीस आले. अशीच एक धक्कादायक घटना हैदराबादमध्ये घडली आहे. २५ वर्षीय तरुण बॅडमिंटन खेळत होता. खेळताना तो अचानक खाली पडला आणि पुन्हा उठलाच नाही. या घटनेचा व्हिडीओ सध्या सोशल मीडियावर व्हायरल होत आहे.

मिळालेल्या माहितीनुसार, राकेश नावाचा २५ वर्षीय तरुण हा बॅडमिंटन खेळत होता. बॅडमिंटन खेळताना तो शटलकॉक उचलण्यासाठी मागे वळला. शटलकॉक उचलल्यानंतर तो बॅडमिंटनच्या कोर्टवर खाली पडला. तेथेच त्याचा मृत्यू झाल्याची माहिती समोर आली आहे. या घटनेमुळे परिसरात मोठी खळबळ उडाली आहे.

मृत तरुणाचे नाव गुंडला राकेश असे आहे. त्याचा मृत्यू हृदयविकाराच्या झटक्याने झाल्याचा अंदाज वर्तवला जात आहे. तो हैदराबादच्या उप्पल स्टेडियमच्या इनडोअर कोर्टमध्ये त्याच्या मित्रांसोबत बॅडमिंटन खेळत होता. खेळादरम्यान शटलकॉक घेण्यासाठी जात असताना तो पडला आणि त्याचा जागीच मृत्यू झाला. ही संपूर्ण घटना बॅडमिंटन कोर्टमधील सीसीटीव्ही कॅमेऱ्यामध्ये कैद झाली.

सीसीटीव्ही फुटेजमध्ये राकेश खाली पडल्यानंतर त्याचे मित्र त्याच्याजवळ जातात हे दिसते. राकेशला त्याचे मित्र उठवण्याचा प्रयत्न करतात पण तो उठत नाही. त्यानंतर त्याला तातडीने रुग्णालयामध्ये नेण्यात आले. रुग्णालयामध्ये नेल्यानंतर उपचार सुरु करण्याआधी डॉक्टरांनी राकेशला मृत घोषित केले. राकेशच्या मृत्युमुळे हळहळ व्यक्त केली जात आहे.