मोठी बातमी! ज्येष्ठ नेते विष्णु मोदी यांचे निधन, राजकीय वर्तुळात शोककळा

राजस्थानच्या राजकारणातील ज्येष्ठ नेते आणि अजमेरचे माजी खासदार विष्णु मोदी यांचे जयपूरमध्ये खाजगी रुग्णालयात निधान झाले आहे. ते 1984 मध्ये अजमेरचे खासदार होते. मागच्या काही दिवसांपासून त्यांची प्रकृती खालावली होती. त्यांच्या निधनाचे वृत्त समजताच राज्याच्या राजकारणात शोककळा पसरली असून मुख्यमंत्र्यांनी दु:ख व्यक्त केले आहे. विष्णु मोदी यांचा जन्म एका राजकीय परिवारात झाला होता. त्यांनी स्वतःच्या हिंमतीवर आणि विकासकामांनी जनतेच्या मनात स्थान मिळवले होते.

खासदार म्हणून त्यांनी १९८४ मध्ये अजमेर लोकसभा मतदारसंघातून प्रचंड बहुमताने विजय मिळवला आणि आठव्या लोकसभेचे सदस्य म्हणून ते दिल्लीत पोहोचले. आमदार म्हणून ते राजस्थान विधानसभेचे दोन वेळा सदस्य होते. त्यांनी १९९३ ते १९९८ पर्यंत पुष्कर मतदारसंघाचे आणि २००३ ते २००८ पर्यंत मसुदा मतदारसंघाचे प्रतिनिधित्व केले. ते १९८१ ते १९८५ या काळात राजस्थान युवक काँग्रेसचे अध्यक्षही होते, जिथे त्यांनी राज्यातील हजारो तरुणांना राजकारणाच्या मुख्य प्रवाहात जोडले.

त्यांचे वडील किशन मोदी हे देखील एक प्रमुख राजकारणी होते, जे १९७१ ते १९७७ पर्यंत सीकरचे खासदार होते. त्यांचे काका मोहनलाल मोदी हे नीमकथाना (सीकर) येथून पाच वेळा आमदार होते, यावरून हे स्पष्ट होते की मोदी कुटुंबाने राजस्थानच्या सेवेसाठी अनेक दशकांचे योगदान दिले आहे. विष्णू मोदी यांनी सीकर जिल्ह्यातील नीमकथाना येथील सरकारी महाविद्यालयातून आपले शिक्षण पूर्ण केले. याच महाविद्यालयातून त्यांनी बी.ए. पदवी मिळवली. ते विद्यार्थी जीवनापासूनच राजकारणात सक्रिय होते आणि नंतर त्यांनी राज्य पातळीवर आपली ओळख निर्माण केली.