Shocking: गुटख्यासाठी नवऱ्यानं पैसे दिले नाहीत, ३ मुलांना विष पाजत महिलेने स्वतःलाही संपवलं

उत्तर प्रदेशमध्ये भयंकर घटना घडली. याठिकाणी एका आईने आपल्या ३ मुलांना जबरदस्तीने विष पाजलं त्यानंतर तिने देखील विष प्राशन करून आत्महत्येचा प्रयत्न केला. नवऱ्याने गुटखा खायला पैसे दिले नाही त्यामुळे संतप्त झालेल्या महिलेने रागाच्या भरात हे भयंकर कृत्य केले. उत्तर प्रदेशच्या चित्रकुट जिल्ह्यातील एका गावामध्ये ही घटना घडली. महिलेचा आणि तिच्या दोन मुलींचा उपचारादरम्यान मृत्यू झाला. तर महिलेच्या मुलाची प्रकृती गंभीर असून त्याच्यावर उपचार सुरू आहेत.

मिळालेल्या माहितीनुसार, गुटखा खायला पैसे देत नाही यावरून महिला आणि तिच्या नवऱ्यामध्ये वाद झाला. नवऱ्याने पैसे द्यायला नकार दिला. त्यामुळे महिला संतप्त झाली. तिने आपल्या २ वर्षे आणि ४ वर्षांच्या दोन मुली आणि ५ वर्षांच्या मुलाला आधी विष पाजलं. त्यानंतर ती देखील विष प्यायली. या चौघांनाही उपचारासाठी मध्य प्रदेशातील सतना जिल्हा रुग्णालयामध्ये दाखल करण्यात आले. चौघांची देखील प्रकृती गंभीर होती. याचवेळी उपचारादरम्यान महिला आणि तिच्या दोन मुलींचा मृत्यू झाला. मुलावर उपचार सुरू असून त्याची प्रकृती चिंताजनक आहे.

पोलिसांनी सांगितले की, बब्बू यादवची बायको झुमकीला (३२ वर्षे) गुटखा खाण्याची सवयी होती. बब्बू तिला गुटखा खाऊ नको असे वारंवार सांगायचा यावरूनच त्यांच्यामध्ये भांडण देखील व्हायचे. शनिवारी झुमकीने नवऱ्याकडे गुटखा खाण्यासाठी पैसे मागितले. त्याने पैसे दिले नाही. त्यानंतर तिने टोकचे पाऊल उचलत मुलांना विष पाजून स्वत: देखील आत्महत्येचा प्रयत्न केला.

बब्बू यादवने सांगितले की, 'मी बायकोला फक्त यासाठी ओरडलो होतो की गुटखा खाण्याची सवयी सोडून दे. आपली मुलं आता मोठी झाली आहेत. त्यांच्यावर वाईट परिणाम होईल. तू आता गुटखा सोडून दे. इथून पुढे मी तुला गुटखा खाण्यासाठी पैसे देणार नाही. असे बोलून मी कामावर निघून गेलो. पण मी जेव्हा घरी परत आलो तेव्हा माझी मुलं पोट धरून जमिनीवर लोळत होती. माझ्या मुलीने सांगितले की, मम्मीने काही तरी कडू खायला घातले. त्यानंतर मी घाबरलो आणि चौघांना रुग्णालयात घेऊन गेलो.'