Ghaziabad Bus Accident: प्रवाशांनी भरलेली बस दुभाजक तोडून उड्डाणपुलावरून पडली खाली, अपघाताचे भीषण दृश्य कॅमेऱ्यात कैद; पाहा व्हिडीओ

Ghaziabad Bus Accident Video:

उत्तर प्रदेशातील दिल्ली-मेरठ एक्सप्रेसवेवर गुरुवारी भीषण अपघात झाला आहे. गाझियाबादमधील फ्लायओव्हरवरून रोडवेजची बस खाली पडली. या अपघातात सुमारे 24 जण जखमी झाले आहेत, असं 'वृत्त टाइम्स ऑफ इंडिया'ने दिलं आहे.

प्राथमिक माहितीनुसार, बस दिल्लीकडून एक्स्प्रेसवेवर येत होती. दरम्यान, चालकाचे बसवरील नियंत्रण सुटल्याने बस हायवेवरून खाली पडली.

पोलिसांनी दिलेल्या माहितीनुसार, बस मेरठहून दिल्लीला जात असताना दिल्ली-मेरठ एक्सप्रेसवेवर (डीएमई) ही घटना घडली. बस चालक प्रदीप याने पोलिसांना सांगितले की, त्याचे स्टेअरिंगवरील नियंत्रण कसे सुटले, हे त्याला माहीत नाही. तो मद्यधुंद अवस्थेत नव्हता. (Latest Marathi News)

घटनेची माहिती देताना डीसीपी विवेक चंद यादव यांनी सांगितलं की, या अपघातात 24 प्रवासी जखमी झाले असून त्यांना संजय नगरच्या संयुक्त सरकारी रुग्णालयात आणि खासगी रुग्णालयात दाखल करण्यात आलं आहे.

सर्व जखमी प्रवासी बिजनौर जिल्ह्यातील असल्याचे डीसीपी यादव यांनी सांगितले. दरम्यान, या घटनेचा सीसीटीव्ही व्हिडिओही समोर आला आहे. ज्यात हा अपघात कसा झाला, ते दिसत आहे.