Accident: महामार्गावर अपघताचा थरार! भरधाव टेम्पो अन् कारची समोरासमोर धडक; ६ जणांचा जागीच मृत्यू

Summary -

• गंगा एक्स्प्रेस वेवर टेम्पो आणि कारची भीषण समोरासमोर धडक

• अपघातात कारमधील सर्व ६ जणांचा जागीच मृत्यू झाला

• वाहनांचा वेग अतिशय जास्त असल्याने झाला अपघात

• अपघातानंतर महामार्गावर वाहतूक कोंडी झाली होती

उत्तर प्रदेशमध्ये भयंकर अपघात झाला. भरधाव टेम्पो आणि कारची समोरासमोर धडक झाली. या अपघातामध्ये ६ जणांचा जागीच मृत्यू झाला. हा अपघात इतका भीषण होता की कारचा चक्काचूर झाला. गुरूवारी रात्री उशिरा गंगा एक्स्प्रेस वेवर अपघाताची ही घटना घडली. या अपघातानंतर महामार्गावर मोठी वाहतूक कोंडी झाली होती.

मिळालेल्या माहितीनुसार, हा अपघात ह्यातनगर पोलिस ठाण्याच्या हद्दीतील रसूलपूर धतरा गावाजवळ झाला. गंगा एक्स्प्रेस वेवर भाजी घेऊन जाणाऱ्या टेम्पोने समोरून येणाऱ्या कारला जोरात धडक दिली. अपघात इतका भयंकर होता की दोन्ही वाहनांचे तुकडे तुकडे झाले. कारमध्ये असलेल्या सर्वांचा जागीच मृत्यू झाला. कारचा चक्काचूर झाल्यामुळे मृतेदह बाहेर काढणं देखील कठीण झाले होते.

अपघातादरम्यान मोठा आवाज झाला. हा आवाज ऐकून स्थानिक गावकऱ्यांनी घटनास्थळी धाव घेतली. त्यांनी पोलिसांना तात्काळ घटनेची माहिती दिली. पोलिसांनी घटनास्थळी धाव घेत दोन्ही वाहनं बाजूला करून सहाही जणांचे मृतदेह बाहेर काढले. मृतांमधील ४ जण अमरोहा जिल्ह्यातील आदमपूरमधील होते. तर दोन जणांची ओळख पटली नाही.

दोन्ही वाहनांचा वेग जास्त होता त्यामुळे दोन्ही वाहनांची समोरासमोर धडक होऊन हा अपघात झाल्याचे स्थानिकांनी सांगितले. पोलिस या अपघाताचा तपास करत आहेत. अपघातानंतर महामार्गावर मोठी वाहतूक कोंडी झाली होती. पोलिसांनी दोन्ही वाहनं बाजूला करत वाहतूक कोंडीचा प्रश्न सोडवला.