Air India Plane Crash: 'मेडे, मेडे, मेडे...विमान उडत नाही, वाचणार नाही', पायलट सुमित सभरवाल यांचा शेवटचा मेसेज अन्...

अहमदाबाद विमान अपघात प्रकरणात मोठी अपडेट समोर आली आहे. अहमदाबादवरून लंडनला जाणाऱ्या विमानाचे पायलट सुमित सभरवालने एअर ट्रॅफिक कंट्रोलरला (ATC) पाठवलेला शेवटचा मेसेज समोर आला आहे. या ५ सेकंदांच्या मेसेजमध्ये सुमित यांनी एटीसीशी संपर्क साधला उड्डानानंतर निर्माण झालेल्या परिस्थितीची माहिती दिली. 'मेडे, मेडे, मेडे...जोर मिळत नाहीये. पावर कमी होत चाललीये आहे. विमान उडत नाहीये. आम्ही वाचणार नाही.'

पायलट सुमित सभरवाल यांनी एटीसीला शेवटचा मेसेज दिल्यानंतर अवघ्या काही सेकंदात विमान अहमदाबादमधील मेडिकल कॉलेजच्या वसतिगृहाच्या इमारतीवर कोसळले. अहमदाबादमध्ये झालेल्या या भयंकर विमान अपघातामधील मृतांचा आकडा वाढला आहे. आतापर्यंत २७५ जणांचा मृत्यू झाला. विमानामधील २४१ जण आणि मेडिकल कॉलेजमधील ३४ जणांचा या अपघातामध्ये दुर्दैवी मृत्यू झाला.

अहमदाबाद विमान अपघातामागे तांत्रिक बिघाड हे प्राथमिक कारण असल्याचे तज्ज्ञांचे म्हणणे आहे. त्यांनी सांगितले की, विमानाच्या व्हिडिओवरून असे दिसून येते की टेक-ऑफ दरम्यान विमानाला जोर मिळत नव्हता. ज्यामुळे विमान उड्डाण करू शकले नाही. अहमदाबाद विमान अपघातानंतर, नागरी विमान वाहतूक महासंचालनालयाने एअर इंडियाला त्यांच्या बोईंग विमानांची अतिरिक्त तपासणी आणि देखभाल करण्याचे निर्देश दिले आहेत.

अहमदाबाद विमान अपघातानंतर विमानाचा ब्लॅक बॉक्स आणि कॉकपिट व्हॉइस रेकॉर्डर सापडला आहे. विमानतळ प्राधिकरणाशी संबंधित एका अधिकाऱ्याने सांगितले की, एक डीव्हीआर देखील सापडला आहे. आता लवकरच या विमान अपघाताचे खरं कारण समजू शकेल. या अपघातामध्ये मृत्यू झालेल्यांचे नातेवाईक अहमदाबाद सिव्हिल हॉस्पिटलमध्ये आले आहेत. कुटुंबातील सदस्यांची डीएनए ओळखण्याची प्रक्रिया सुरू झाली आहे. डीएनए नमुन्यांच्या आधारे मृतदेह मृतांच्या नातेवाईकांना सोपवले जात आहेत.