Allahabad High Court: उत्तर प्रदेशमधून (Uttar Pradesh) एक वेगळी बातमी समोर येत आहे. येथे अलाहाबाद उच्च न्यायालयाने बलात्कार प्रकरणात पीडित मुलगी 'मांगलिक' (Manglik Girl) आहे की नाही? याची चौकशी करण्याचे आदेश दिले होते. ज्याची दखल आता स्वतः सर्वोच्च न्यायालयाने घेतली असून या आदेशाला स्थगिती देण्यात आली आहे.
सर्वोच्च न्यायालयाचे (Supreme Court) न्यायमूर्ती सुधांशू धुलिया आणि न्यायमूर्ती पंकज मित्तल यांच्या खंडपीठाने उच्च न्यायालयाच्या आदेशाची स्वत:हून दखल घेत हा स्थगितीचा आदेश दिला. तसेच हा आदेश गोपनीयतेच्या अधिकारावर गदा आणणारा असल्याचं सर्वोच्च न्यायालयाने म्हटलं आहे.
बलात्कार प्रकरणातील आरोपीने अलाहाबाद उच्च न्यायालयात जामिनासाठी अर्ज दाखल केला होता. त्यावर न्यायालयात झालेल्या सुनावणीदरम्यान आरोपीने पीडित मुलगी मांगलिक आहे, त्यामुळे तो तिच्याशी लग्न करू शकत नाही, असा युक्तिवाद केला. आरोपीचा हा युक्तिवाद ऐकल्यानंतर उच्च न्यायालयाने लखनौ विद्यापीठाच्या ज्योतिष विभागाला बलात्कार पीडितेची कुंडली तपासण्याचे आदेश दिले. (Latest Marathi News)
अलाहाबाद उच्च न्यायालयाचे न्यायमूर्ती बृजराज सिंह यांनी आदेशात म्हटले होते की, ''याचिकाकर्त्याने दावा केला आहे की मुलगी मांगलिक आहे. त्यामुळे तिचा विवाह बिगर मांगलिक पुरुषाशी होऊ शकत नाही. अशा स्थितीत मुलगी खरोखरच मांगलिक आहे की नाही? हे जाणून घेण्यासाठी दोन्ही पक्षांनी आपापल्या कुंडली लखनऊ विद्यापीठाच्या ज्योतिष विभागाचे प्रमुख प्राध्यापक यांच्यासमोर मांडल्या पाहिजेत.'' उच्च न्यायालयाने ज्योतिष विभागाच्या प्रमुखांना कुंडलींचा अभ्यास करून तीन आठवड्यांत अहवाल सादर करण्याचे निर्देश दिले होते.
अलाहाबाद उच्च न्यायालयाच्या या आदेशाची सर्वत्र खूप चर्चा झाली आणि अनेक वृत्तपत्रातही यासंदर्भात बातम्या प्रसिद्ध झाल्या. या संदर्भातील बातमी वाचून सर्वोच्च न्यायालयाने या प्रकरणाची स्वत:हून दखल घेतली आणि शनिवारी सुनावणी करताना उच्च न्यायालयाच्या आदेशाला स्थगिती दिली.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.