Breaking : मोठी बातमी! लडाख हिंसाचारात ४ जणांचा मृत्यू; अखेर सोनम वांगचुक यांना अटक, इंटरनेट सेवाही बंद

Sonam Wangchuk Arrest : राज्याचा दर्जा मिळावा यासाठी सध्या लडाखमध्ये आंदोलन सुरु आहे. यासाठी सुरु असलेल्या आंदोलनाचे नेतृत्त्व सोनम वांगचुक करत आहेत. पोलिसांनी सोनम वांगचुक यांच्याविरोधात मोठी कारवाई केली आहे. पोलिसांनी लडाख हिसांचारात ४ जणांचा मृत्यू झाल्यानंतर सोनम वांगचुक यांना अटक केली आहे. अटकेनंतर तेथील इंटरनेट सेवा बंद करण्यात आली आहे. वांगचुक यांच्या अटकेचा आंदोलनावर परिणाम होईल का? असा प्रश्न उपस्थित केला जात आहे.

लेहमध्ये बंद दरम्यान लडाखला राज्याचा दर्जा मिळावा यासाठी आंदोलन करणारे आंदोलक आणि सुरक्षा कर्मचाऱ्यांमध्ये संघर्ष झाला. या व्यापक संघर्षामध्ये ४ जणांचा मृत्यू झाला. ४० पोलीस कर्मचाऱ्यांसह ८० जण जखमी झाले होते. या घटनेनंतर दोन दिवसांनी म्हणजेच आज (२६ सप्टेंबर) रोजी अटक झाली आहे. ते दुपारी अडीच वाजता पत्रकार परिषद घेणार होते. पण त्याआधीच त्यांना अटक झाली.

गुरुवारी (२५ सप्टेंबर) केंद्रीय गृह मंत्रालयाने सामाजिक कार्यकर्ते सोनम वांगचुक यांनी स्थापन केलेल्या स्टुडंट्स एज्युकेशनल अँड कल्चरल मूव्हमेंट ऑफ लडाख म्हणजेच एसईसीएमओएचा एफसीआरए परवाना तात्काळ रद्द केला होता. लडाखला राज्याचा दर्जा आणि संवैधानिक संरक्षणाची मागणी करणाऱ्या आंदोलनाचे नेतृत्त्व करणाऱ्या सोनम वांगचुक यांनी वैयक्तिक सुरक्षेची चिंता देखील व्यक्त केली होती.

'मला वाटते की ते (प्रशासन) माझ्यावर सार्वजनिक सुरक्षा कायद्याच्या अंतर्गत खटला चालवण्याचा आणि मला दोन वर्षे तुरुंगात टाकण्याचा प्रयत्न करत आहेत', असे सोनम वांगचुक म्हणाले होते. 'माझ्यावर कारवाई होणार आहे, यासाठी मी तयार आहे', असेही त्यांनी म्हटले होते. सोनम वांगचुक यांना तुरुंगात ठेवल्याने जास्त समस्या निर्माण होऊ शकतात अशी शक्यता वर्तवली जात आहे.