Metro Train : मेट्रोतून प्रवास करताना चुकूनही झोपू नका, नाहीतर भरावा लागेल हजारोंचा दंड

लोकल प्रमाणे आता मेट्रोमध्येही प्रवाशांची वर्दळ पाहायला मिळत आहे. प्रवासी प्रवास काळात वेळ जाण्यासाठी गाणी बोलतात, काही मोबाईलमध्ये काम करतात तर काही फावल्या वेळेत आपली झोप पूर्ण करतात. मात्र आता मेट्रोमध्ये झोप काढली तर खिशाला भुर्दंड बसणार आहे. मेट्रोत जमिनीवर बसणे किंवा सीटवर झोपणे प्रवाशांना चांगलेच महागात पडणार आहे. असे दुबईतील रस्ते आणि वाहतूक प्राधिकरणाने म्हटलं आहे.

मिळालेल्या माहितीनुसार, सोशल मीडियावर एक पोस्ट व्हायरल झाली होती. या पोस्टमध्ये एका नेटकऱ्याने मेट्रो मधला फोटो शेअर करत म्हटलं आहे की, लोक मेट्रोमध्ये कसेही बसतात. शिवाय ते बसल्या बसल्या झोपतात. काहीजण मेट्रोमध्ये जमिनीवर बसतात. यामुळे इतर प्रवाशांना प्रवासादरम्यान अनेक त्रास होतात.

याचा परिणाम अनेकदा कामावर होतो. हि चिंताजनक बाब असल्याचं या नेटकऱ्याने म्हटलं. दुबईमधील या तरुणाच्या पोस्टनंतर देशातील रस्ते आणि वाहतूक प्राधिकरण खडबडून जागे झाले. यानंतर दुबई मेट्रोने अशा प्रवाशांना कडाडून इशारा दिला आहे. त्यांनी म्हटले आहे की, मेट्रोमध्ये प्रवाशांनी बसून झोपू नये.

तसेच बसल्या जागी स्थिर बसावे आपल्यामुळे इतरांना त्रास होता कामा नये. शिवाय मेट्रोमध्ये खाली जमिनीवर बसू नये. ज्यामुळे इतरांना अडचणी निर्माण होतील. असे निदर्शनास आल्यास संबंधित प्रवाशांवर कारवाई केली जाणार असल्याचं दुबईच्या रस्ते आणि वाहतूक प्राधिकरणाने म्हटलं आहे. त्यामुळे आता मेट्रोमध्ये डुलकी काढला तर मोठा अनर्थ होईल.