Shocking : शिक्षिकेच्या प्रेमात विद्यार्थी झाला वेडापिसा, प्रपोज केला पण नकार दिला, रागात तिच्या ओठांवरून चाकू फिरवला अन्...

प्रेम आंधळं असतं! हे वाक्य आपण अनेकदा ऐकतो. या वाक्याची प्रचिती देखील तुम्हाला आली असेलच. अशीच एक घटना उत्तर प्रदेशातून समोर आली आहे. एका नामांकित कॉलेजमधील विद्यार्थी त्याच्या शिक्षिकेवर एकतर्फी प्रेम करत होता. या एकतर्फी प्रेमाचं प्रपोजल नाकारलं म्हणून विद्यार्थ्याने शिक्षिकेसोबत भररस्त्यात भयंकर कृत्य केलं. या घटनेचा व्हिडिओ सध्या सोशल मीडियावर तुफान व्हायरल होत आहे.

मिळालेल्या माहितीनुसार, उत्तर प्रदेशातील मैनपुरी येथील कोतवाली परिसरात २० जानेवारी रोजी सदर घटना घडली आहे. आग्रा रोडवरील एका खासगी कॉलेजमध्ये पीडित शिक्षिका शिकवत होती. या कॉलेजमधील अखंड प्रताप नावाचा विद्यार्थी पीडितेवर एकतर्फी प्रेम करायचा. या एकतर्फी प्रेमातून तो दररोज संबंधित शिक्षिकेचा पाठलाग करायचा. तिची भर रस्त्यात छेड काढायचा. अनेक दिवसांपासून सुरु असलेल्या प्रकाराबाबत शिक्षेकेने अखंड प्रतापच्या पालकांना तक्रार केली.

पालकांनी त्याला सक्त ताकीद दिली. मात्र याला न जुमानता विद्यार्थ्याचं गैरवर्तन सुरुचं राहिलं. २० जानेवारी रोजी पीडित शिक्षिका आग्रा रोडवरील खासगी शाळा सोडून मैनपुरी शहरातील ज्योती रोडवरील दुसऱ्या शाळेत शिकवण्यासाठी जात होती. यादरम्यान तिथे अखंड प्रताप पोचला. त्याने शिक्षिकेच्या खांद्यावर हात टाकला आणि अश्लील वर्तन केले. एवढ्यावरच न थांबता या विद्यार्थ्याने आपल्या प्रेमाची कबुली दिली. संतापलेल्या शिक्षिकेने त्याला विरोध केला.

या विरोधानंतर विद्यार्थी संतापला त्याने भररस्त्यात बंदुकीचा धाक दाखवत शिक्षिकेच्या ओठांना अश्लील स्पर्श केला आणि नंतर धारदार शस्त्राने शिक्षिकेचे ओठ कापले. या हल्ल्यात पीडित शिक्षिका गंभीर जखमी झाली. ही घटना जवळच असलेल्या एका सीसीटीव्ही फुटेजमध्ये कैद झाली आहे. याप्रकरणी पीडित शिक्षिकेच्या भावाने पोलीस ठाण्यात तक्रार केली असून पीडितेला जखमी अवस्थेत जिल्हा रुग्णालयातून आग्रा येथील पुष्पांजली रुग्णालयात दाखल करण्यात आले आहे. दरम्यान आरोपी विद्यार्थी अद्याप फरार असून पोलीस या घटनेचा सविस्तर तपास करत आहेत. या घटनेचा व्हिडिओ सोशल मीडियावर व्हायरल झाला असून नेटकऱ्यांनी संताप व्यक्त केला आहे.