Raja Raghuvanshi: तिला फासावर लटकवा, सख्ख्या भावानं सोनमशी तोडलं नातं; राजा रघुवंशीसाठी ढसाढसा रडला

राजा रघुवंशी हत्याकांड प्रकरणात मोठा ट्विस्ट समोर आलाय. राजा रघुवंशीची हत्या त्याची बायको सोनमने केली. सोनमने तिचा बॉयफ्रेंड राज कुशवाहसोबत मिळून राजाच्या हत्येचा प्लान करत ३ शूटर्सला हत्येची सुपारी दिली होती. पाचही आरोपी सध्या अटकेत आहेत. आता या प्रकरणात रोज नवनवीन धक्कादायक खुलासे समोर येत आहेत. सोनमचा भाऊ गोविंद रघुवंशीने आज इंदुरमध्ये जाऊन राजा रघुवंशीच्या कुटुंबीयांची भेट घेतली. यावेळी तो राजाच्या आईच्या गळ्यात पडून ढसाढसा रडला.

गोविंदने यावेळी माध्यमांशी बोलताना सांगितले की, 'जर सोनम दोषी असेल तर तिला फासावर लटकवा. आम्हाला सोनम आणि राजच्या नात्याबद्दल काहीच माहिती नव्हती. आम्ही सोनमशी नातं तोडलं आहे. आम्ही राजा रघुवंशीच्या कुटुंबीयांसोबत आहोत. राजाला न्याय मिळाला पाहिजे.'

राजाच्या आईची भेट घेतल्यानंतर गोविंदने सांगितले की, 'सोनमचं कुणासोबत प्रेमसंबंध नव्हते. जो कुणी दोषी असेल त्याला फाशी द्या. राज कुशवाह फक्त आमचा कर्मचारी आहे. सोनम आणि राजचे फक्त एक कर्मचारी म्हणून बोलणं व्हायचं. सोनम राज कुशवाहला राखी बांधायची.'

गोविंदने पुढे असे देखील सांगितले की, 'गाजीपूरमध्ये मी फक्त २ मिनिटं सोनमला भेटलो. तेव्हा तिने गुन्हा कबुल केला नव्हता. सोनमने कधीच आपल्या आईला राज कुशवाहबद्दल सांगितले नाही. सोनमचं लग्न लवकर यासाठी झालं कारण पंडितने मुहूर्त काढला होता.'

तर दुसरीकडे, 'राजाचा भाऊ विपिन रघुवंशीने सांगितले की, गोविंद मंगळवारीच इंदुरला आला होता. त्याला हत्याकांडाची काहीच माहिती नव्हती. आम्ही गोविंदशी बोलत आहोत कारण तो त्याला या कटाविषयी काहीच माहिती नव्हती. गोविंद चांगला स्वभावाचा आहे. पण सोनमने सात कुटुंबं उद्ध्वस्त केली.

राजा रघुवंशी हत्याकांड प्रकरणात मेघालय पोलिसांनी सोनम, राज कुशवाह आणि तीन कॉन्ट्रॅक्ट किलर आकाश राजपूत, विशाल उर्फ ​​विकी ठाकूर आणि आनंद कुर्मी यांना अटक केली आहे. या प्रकरणात गोविंदच्या भूमिकेबद्दल कोणतेही पुरावे सापडले नाहीत. राजाचे कुटुंबीय आणि रघुवंशी समुदाय मारेकऱ्यांना फाशीची शिक्षा देण्याची मागणी करत आहेत.