Bogus Voter Scam: राहुल गांधींकडून पुराव्यांसह बोगस मतदारांचा भांडाफोड; सांगितली नोंदणीची मोडस ऑपरेंडी

राहुल गांधींनी पुराव्यांसह बोगस मतदारांचा भांडाफोड केल्याचा दावा केलाय. मात्र या बोगस मतदारांच्या नोंदणीची मोडस ऑपरेंडी कशी आहे? आणि खरंच महाराष्ट्रात 1 कोटी बोगस मतदार आढळले आहेत का? पाहूयात यावरचा हा स्पेशल रिपोर्ट. बनावट मतदान, बोगस पत्ते, एकाच पत्त्यावर अनेक मतदार असे महाराष्ट्रात 5 महिन्यात तब्बल 1 कोटी बोगस मतदार वाढल्याचे पुरावे दाखवून राहुल गांधींनी निवडणूक आयोगाला थेट आरोपीच्या पिंजऱ्यात उभं केलंय. (Rahul Gandhi Claims 1 Crore Bogus Voters In Maharashtra With Proof)

महाराष्ट्र विधानसभेची निवडणूक झाल्यानंतर बोगस मतदानाच्या शंकांना बळ मिळालं आणि तिथून काँग्रेस कार्यकर्त्यांनी बोगस मतदारांता पर्दाफाश केलाय. त्याची मोडस ऑपरेंडीच राहुल गांधींनी सादरीकरणात उलगडून सांगितलीय.

टेक राज सपकोटा 40 वर्षीय मतदार

टेक राज सपकोटाच्या वडिलांचं नाव DFOGADF

सपकोटाच्या घराचं नाव 0

मतदाराचा EPIC नंबर SVF8249344 आहे

फक्त टेक राज सपकोटाच नाही तर देशभरात हजारो बोगस मतदार असल्याचा दावा गांधींनी केलाय.

तर महाराष्ट्राच्या मतदारयादीत 40 लाख बोगस मतदार रहस्यमयरित्या घुसवण्यात आल्याचा दावा करत राहुल गांधींनी निवडणूक आयोगावर प्रश्नांची सरबत्ती केलीय.

महाराष्ट्राच्या निवडणुकीत सायं. 5.30 नंतर अचानक लाखो मतदार कसे वाढले?

डेटाची मागणी करुनही इलेक्ट्रॉनिक डेटा का मिळत नाही?

3 वेळा डुप्लिकेट मतदान केलेले 11 हजार मतदार कुठून आले?

एकाच घराच्या पत्त्यावर 46 मतदार कसे?

राहुल गांधी फक्त प्रश्न विचारुनच थांबले नाहीत तर त्यांनी निवडणूक आयोगाने डेटा डिलीट का केला? असा सवाल उपस्थित केलाय. राहुल गांधींनी आयोगाच्या एकूणच कार्यपध्दतीची चिरफाड केल्यानंतर मुख्यमंत्री देवेंद्र फडणवीस यांनी गांधींवर पलटवार केलाय. महाराष्ट्र, कर्नाटक, हरियाणा या राज्यातील बोगस मतदारांची माहिती सादर करत राहुल गांधींनी निवडणूक आयोगाची कोंडी केलीय.. त्यामुळे राहुल गांधींनी पुराव्यासह केलेल्या आरोपांना निवडणूक आयोग उत्तर देणार की तोंडावर बोट ठेऊन विरोधी पक्षनेते राहुल गांधींच्या आरोपांकडे दुर्लक्ष करणार? याकडे देशाचं लक्ष लागलंय