डाव्यांच्या केरळमध्ये राजकीय भूकंप; तब्बल चार दशकानंतर तिरुवनंतपुरममध्ये भाजपचा ऐतिहासिक विजय

केरळच्या राजकारणात मोठा राजकीय भूकंप झाला आहे. केरळच्या तिरुवनंतपुरममधील स्थानिक स्वराज्य संस्थेच्या निवडणुकीत भारतीय जनता पक्षाने ऐतिहासिक विजय मिळवला आहे. तिरुवनंतपुरम महापालिकेची सत्ता भाजपने डावी लोकशाही आघाडीकडून हिसकावून घेतली आहे. भाजपच्या ऐतिहासिक विजयानंतर केरळमध्ये राजकीय चर्चांना उधाण आलं आहे.

तिरुवनंतपुरम केवळ केरळची राजधानी नाही. तर राजकीय दृष्टीकोनातूनही महत्वाचं क्षेत्र मानलं जातं. या भागातील लोकसभा मतदारसंघातून काँग्रेसचे दिग्गज नेते आणि माजी केंद्रीय मंत्री शशी थरूर चार वेळा खासदार म्हणून निवडून आले आहेत. या भागात गेल्या काही वर्षांत काँग्रेस आणि डाव्यांचा प्रभाव होता. मात्र, आता या भागात भाजपचा विजय नव्या राजकीय समीकरणाची नांदी मानली जात आहे.

राजकीय विश्लेषकांच्या मते, स्थानिक स्वराज्य संस्थेमधील विजय हा ४-५ विधानसभा मतदारसंघात विजय मिळवण्याचा सारखा आहे. स्थानिक स्वराज्य संस्थेच्या निवडणुकीत भाजपची एन्ट्री झाल्याने मतदारांना नवा पर्याय हवा असल्याचे संकेत मिळत आहेत. या भागात राजकीय लढाई विशेष म्हणजे हा LDF आणि UDF मध्ये व्हायची.

मात्र, आता स्थानिक स्वराज्य संस्थेच्या निवडणुकीतून स्पष्ट दिसत आहे की, शहरी मतदारांची LDF च्या विरोधात नाराजी आहे. शहरातील विकास कामे, पारदर्शक कारभार आणि स्थानिक मुद्द्यांवरून मतदारांनी थेट भाजपला साथ दिल्याचे समोर आलं आहे. तिरुवनंतपुरममध्ये भाजप निवडून आल्याने डाव्यांचा बालेकिल्ला ढासळू लागल्याची चर्चा सुरू झाली आहे.

तिरुवनंतपुरम महापालिकेत भाजपने ऐतिहासिक विजय मिळवल्यानंतर पंतप्रधान नरेंद्र मोदी यांनी स्थानिक कार्यकर्त्यांना शुभेच्छा दिल्या आहेत. तसेच त्यांनी तिरुवनंतपुरमच्या नागरिकांचेही आभार मानले आहेत.