Imran Khan Arrested: भेटवस्तू घोटाळाप्रकरणी इम्रान खान यांना 3 वर्षांच्या कारावासाची शिक्षा; 5 वर्ष निवडणूक लढवण्यास बंदी!

Imran Khan News: पाकिस्तानचे माजी पंतप्रधान इम्रान खान यांच्या अडचणीत मोठी वाढ झाली आहे. तोषखाना केसप्रकरणी इम्रान खान यांना ३ वर्षांची शिक्षा सुनावण्यात आलीये. यामुळे पुढील ५ वर्षे इमरान खान यांना निवडणूक देखील लढवता येणार नाही.

तोषखाना प्रकरण आहे तरी काय?

परदेशातील मान्यवरांकडून कोणतीही भेटवस्तू मिळाल्यास ती स्टेट डिपॉझिटरी म्हणजेच तोशाखान्यात ठेवावी लागते, असं पाकिस्तानच्या कायद्यात नमुद आहे.

राज्याच्या प्रमुखाला जेव्हा भेटवस्तू ठेवायची असते तेव्हा त्याला त्या भेटवस्तूच्या किंमतीइतकी रक्कम द्यावी लागेल. लिलाव प्रक्रियेद्वारे हे ठरवले जाते. त्यातून मिळणारा पैसा राष्ट्रीय तिजोरीत जमा केला जातो.

इम्रान खान यांनी तोशखाना येथून सवलतीच्या दरात मिळालेल्या महागड्या ग्राफ रिस्टवॉचसह विविध भेटवस्तू पंतप्रधान असताना नफ्यात विकल्याचा आरोप करण्यात आला होता. इम्रान खान यांना सुमारे १४ कोटी रुपयांच्या ५८ भेटवस्तू मिळाल्या होत्या. त्या त्यांनी घोटाळा केल्याचा आरोप करण्यात आला होता.

एका वृत्त संस्थेने दिलेल्या माहितीनुसार, इम्रान खान यांनी या भेटवस्तू तोशाखान्यातून २.१५ कोटी रुपयांना विकत घेतल्या होत्या आणि त्या बाहेर विकून ५.८ कोटी रुपयांचा नफा कमावला. यात एक महागडा पेन, एक अंगठी, चार रोलेक्स घड्याळं, एक ग्राफ घड्याळ, कफलिंकची एक जोडी यांचा समावेश होता. याच प्रकरणी इम्रान खान यांना आता ३ वर्षांच्या कारावासाची शिक्षा सुनावण्यात आली आहे.