Dubai Rain Alert : दुबईवर जलप्रलयाचं संकट! मुसळधार पावसाच्या शक्यतेने फ्लाईट्स रद्द, शाळा बंद

नवी दिल्ली : दुबईवर पुन्हा एकदा जलप्रलयाचं संकट उभं ठाकलं आहे. दुबईतील विविध भागातील पावसाच्या शक्यतेमुळे विमानतळावरील अनेक विमान उड्डाणे रद्द करण्यात आली आहेत. तसेच शाळा देखील बंद करण्यात आल्या आहेत. तसेच कर्मचाऱ्यांना वर्क फ्रॉम होम करण्याच्या सूचना देण्यात आल्या आहेत. मुसळधार पावसाच्या शक्यतेमुळे दुबई सरकारने नागरिकांना अलर्ट मोड जारी केला आहे.

दुबईतील हवामान विभागाने, गुरुवारी ऑरेंज अलर्ट जारी करत विजेच्या गडगडासह मुसळधार पावसाची शक्यता वर्तवली आहे. तर दुबईत मध्यरात्री २.३५ वाजता पावसाने हजेरी दर्शवली.

या पार्श्वभूमीवर दुबई सरकारने लोकांना समुद्र किनाऱ्यापासून दूर राहण्याच्या सूचना दिल्या आहेत. होडीचा वापर न करण्याच्या सूचना दिल्या आहेत. तसेच सरकारने सखल भागातून वाहने जपून चालवण्याचा सूचना दिल्या आहेत. हवामान विभागाने पुढील काही तास मुसळधार पावसाची शक्यता वर्तवली आहे. तसेच पुढील दोन दिवस मुसळधार पावसाची शक्यता वर्तवली आहे.

कंपन्यांकडून कर्मचाऱ्यांना वर्क फ्रॉमच्या सूचना

दुबईतील मुसळधार पावसाच्या शक्यतेमुळे अनेक कंपन्यांनी कर्मचाऱ्यांना घरून काम करण्याचा सूचना दिल्या आहेत. तसेच अनेक शाळांना ऑनलाईन स्वरुपात वर्ग भरविण्यास सांगितलं आहे.

१६ एप्रिलला जोरदार पाऊस

तत्पूर्वी, दुबईतील नागरिकांना १६ एप्रिल रोजी मुसळधार पावसाचा सामना करावा लागला. त्या मुसळधार पावसामुळे लोकांना अनेक समस्यांना सामोरे जावं लागलं. दुबईतील विमानतळावरही पाणी भरलं होतं. तर रस्त्यावर वाहने तरंगत होती.