Monsoon: आनंदी आनंद गडे! मान्सून अंदमानमध्ये दाखल

अक्षय बडवे, साम प्रतिनिधी

पुणे : आज मान्सून अंदमानमध्ये दाखल झाला आहे. अंदमान समुद्र तसेच बंगालच्या खाडीमध्येही मान्सून आज दाखल होणार आहे. भारताचे मुख्य भूमी म्हणजेच ३१ मे रोजी केरळमध्ये मान्सून दाखल होण्याची शक्यता आहे. जूनमधील पहिल्या आठवड्यात मान्सून महाराष्ट्रात बरसणार असल्याचा अंदाज हवामान विभागाने व्यक्त केलाय. निकोबार बेटावर गेल्या २४ तासात चांगला पाऊस झालाय.

मान्सून अंदमान निकोबारमध्ये दाखल झाल्यानंतर आता त्याची वाटचाल केरळकडे सुरू होणार आहे. अंदमानमधून नैऋत्य मोसमी वाऱ्यांना केरळपर्यंत पोहचण्यासाठी १० दिवस लागतात. मान्सूनची वाटचाल अशीच राहिली तर ३१ मे पर्यंत केरळमध्ये दाखल होणार असल्याचा अंदाज वर्तवण्यात आलाय. मे महिना सुरू होताच अनेकांच्या डोळे नैऋत्य मान्सूनकडे लागत असतात. यंदा मान्सून अंदमान निकोबार बेटांमध्ये वेळेआधी येणार असल्याचे हवामान विभागाने म्हटलं होतं.

आयएमडीने १९ मे ला मान्सून अंदमानमध्ये दाखल होईल असा अंदाज वर्तवला होता. त्यानुसार मान्सून अंदमान, मालदीव, कोमोरिनच्या काही भागात दाखल झालाय. मान्सून दाखल झाल्यामुळे अंदमानमध्ये पाऊस सुरु झालाय. यासंदर्भात ट्विट पुणे हवामान विभागाचे प्रमुख के एस होसाळीकर यांनी केले आहे.

राज्यात सुरू असलेल्या अवकाळी पावसाचा मुक्काम आणखीच वाढणार असून येत्या शुक्रवारपर्यंत अनेक भागात तुफान पाऊस कोसळणार असा अंदाजही वर्तवण्यात आलाय. मराठवाडा, विदर्भात सर्वांत अधिक अवकाळी पाऊस कोसळण्याची शक्यता आहे. मध्य महाराष्ट्रातील काही भागात गारपीट, तर कोकणात गरमी आणि आर्द्रता वाढणार आहे. यापार्श्वभूमीवर अनेक जिल्ह्यांना पावसाचा येलो अलर्टही जारी करण्यात आलाय. हवामान खात्याने नांदेड, लातूर, धाराशिव, अकोला, अमरावती, बुलडाणा, भंडारा, चंद्रपूर, गडचिरोली, गोंदिया, नागपूर, वर्धा, वाशिम, यवतमाळ जिल्ह्याला येत्या २४ मेपर्यंत येलो अलर्ट जारी केलाय.