साफसफाई करताना अचानक मोठा स्फोट; एकाच कुटुंबातील तिघांचा मृत्यू, २ गंभीर जखमी

झारखंडच्या हजारीबाग जिल्ह्यातील हबीबी नगरमध्ये मोठा स्फोट झाल्याची घटना घडली आहे. या स्फोटात एकाच कुटुंबातील तिघांचा मृत्यू झाला. मृतांमध्ये पती-पत्नी आणि एका लहान मुलाचा समावेश आहे. स्फोटात दोघे जखमी झाले आहेत. त्यांना तातडीने रुग्णालयात दाखल करण्यात आलं आहे. घरात नेमका स्फोट कसा झाला, याचा शोध घेणे सुरू आहे.

मिळालेल्या माहितीनुसार, बडा बाजार पोलीस स्टेशनच्या हद्दीतील हबीबी नगरमध्ये स्फोटाची घटना घडली. एक व्यक्ती घराच्या आवारात असलेली झुडपे साफ करताना अचानक स्फोट झाला. या स्फोटात तिघांचा मृत्यू झाला. तर गंभीर जखमी झालेल्या दोघांना तातडीने रुग्णालयात दाखल करण्यात आलंय. एक जनावर देखील जखमी झालं.

स्थानिकांच्या माहितीनुसार, व्यक्ती साफसफाई करताना फावडा जमिनीवर आदळत होता. त्यावेळी एक मोठा स्फोट झाला. हा स्फोट इतका मोठा होता की, आजूबाजूच्या परिसरात खळबळ उडाली. या घटनेत तिघांचा मृत्यू झाला. स्फोटात तिघांच्या मृत्यूने परिसरात एकच खळबळ उडाली. घटनेची माहिती मिळताच पोलिसांनी घटनास्थळी धाव घेतली. पोलिसांनी या प्रकरणी पुढील तपास सुरू केला आहे.

घटनास्थळी आता परिस्थिती काय?

स्फोटानंतर परिसरात लोकांची एकच धावाधाव झाली. काहींना तातडीने स्फोटाची माहिती पोलिसांना दिली. पोलिसांनी घटनास्थळी पोहोचून परिस्थिती हाताळली. पोलीस पथकाने परिसरात पाहणी केली. प्रत्यक्षदर्शींची चौकशी केली. स्फोटामुळे परिसरात दहशत पसरली आहे. स्फोट झालेल्या परिसरातील स्थानिकांना सुरक्षित ठिकाणी नेण्यात आलं आहे. पोलिसांच्या अंतिम तपासानंतर स्फोटाचे कारण समोर येणार आहे. त्यामुळे लोकांनी अफवांना बळी न पडण्याचे आवाहन पोलिसांनी केलं आहे.