Manish Sisodia CBI Remand: मनिष सिसोदिया यांना ४ मार्चपर्यंत सीबीआय कोठडी

नवी दिल्ली : दिल्ली सरकारच्या नवीन अबकारी धोरणात झालेल्या कथित भ्रष्टाचार प्रकरणात दिल्लीचे उपमुख्यमंत्री आणि आम आदमी पक्षाचे नेते मनीष सिसोदिया यांना सीबीआयने सोमवारी दुपारी राऊस अॅव्हेन्यू न्यायालयात हजर केले.

सुनावणीनंतर न्यायालयाने त्यांच्या कोठडीबाबत निर्णय दिला आहे. राऊस अॅव्हेन्यू कोर्टाने मनीष सिसोदिया यांना पाच दिवसांची सीबीआय कोठडी सुनावली आहे.  (Political News)

मनीष सिसोदिया ४ मार्चपर्यंत सीबीआय कोठडीत राहणार आहेत. सिसोदिया यांना न्यायालयात हजर केल्यानंतर सीबीआयने पाच दिवसांची कोठडी मागितली होती, ती न्यायालयाने मान्य केली.

दिल्लीचे उपमुख्यमंत्री मनिष सिसोदिया यांना सीबीआयने कथित दारू घोटाळ्यात काल ८ तासांच्या चौकशीनंतर अटक केली होती.सीबीआयने न्यायालयात युक्तीवाद करताना सिसोदिया योग्य उत्तर देत नसल्याचं म्हटलं. यावर न्यायालयाने निर्णय राखून ठेवला होता.

दिल्ली सरकारच्या नवीन अबकारी धोरणात कथितपणे भ्रष्टाचार झाल्याचा आरोप आप सरकारवर सातत्याने केला जात आहे. यामध्ये व्यापाऱ्यांना फायदा होईल असं अबकारी धोरण तयार करण्यात आल्याचा आरोप आहे. तसंच एका अधिकाऱ्याने देखील या सर्व प्रकरणात आयएएस अधिकाऱ्याचं नाव घेतलं आहे.