Manish Sisodia : मनीष सिसोदिया यांना दिलासा नाहीच; १८ एप्रिलपर्यंत न्यायालयीन कोठडीत वाढ

Delhi News :

दारू घोटाळा प्रकरणी महत्वाची अपडेट समोर आली आहे. दिल्लीचे माजी उपमुख्यमंत्री मनीष सिसोदिया यांच्या अडचणी आणखी वाढल्या आहेत. सिसोदिया यांना आणखी १८ एप्रिलपर्यंत कोर्टाने न्यायालयीन कोठडी सुनावली आहे.

कथित दिल्ली दारू घोटाळा प्रकरणी सिसोदिया सध्या अटकेत आहेत. त्यांच्या जामीन अर्जावर आज राऊस ॲव्हेन्यू कोर्टात सुनावणी होती. या सुनावणीमध्ये त्यांना दिलासा मिळेल अशी शक्यता होती, मात्र तसे झाले नाही.

मागच्या सुनावणीवेळी सिसोदिया यांनी कोर्टाला सांगितले होते की, मला तुरुंगात ठेवून काही फायदा नाही. कथित दिल्ली दारू धोरणाशी संबंधित मनी लाँड्रिंग प्रकरणात माझ्याविरुद्धचा तपास आधीच पूर्ण झालाय. तपासात अडथळा आणण्याची किंवा पुरावे नष्ट करण्याची माझ्याकडून कुठलीही शक्यता नाही.

जर न्यायालयाने मला जामीन देण्याचा निर्णय घेतला तर न्यायालयाच्या कोणत्याही अटींचे पालन करण्यास मी तयार असल्याचं सिसोदियांनी म्हटलं होतं. २६ फेब्रुवारी २०२३ पासून सिसोदिया तुरुंगात आहेत. आज त्यांना जामीन मिळतो याकडे सर्वांचं लक्ष लागून होतं मात्र कोर्टाने त्यांना आणखी १२ दिवस न्यायालयीन कोठडी सुनावली आहे.